Сунтаартан төрүттээх Зафарджон Решетников Саха сирин национальнай многоборьетыгар бастыыр иһин күрэхтэһии түмүгүнэн иккис миэстэни ылла. Ол эрээри кини быйыл атырдьах ыйыгар эрэ 18 сааһын туолла. Оттон улахан күрэхтэһиигэ спорт сорох көрүҥнэригэр үчүгэй көрдөрүүлэри ситистэ. «Боотур» кулууп иитиллээччитэ Дыгын оонньууларыгар путевка иһин киирсэр былааннаах, диэн ЯСИА иһитиннэрэр.
Зафарджон Решетников былырыыҥҥа диэри оҕолор ортолоругар мас-рестлиҥҥэ киирсэрэ, онно Монголияҕа аан дойду пьедесталыгар тиийэ үүммүтэ. Оттон билигин кини национальнай многоборьеҕа эр дьон ортотугар күрэхтэһэр кыахтанна.
Саха сиригэр бастыыр иһин юниордар ортолоругар Сунтаар спортсмена эрэллээхтик иккис миэстэни ылла, ол эрээри кини кыһыл көмүһү ылар кыахтаах этэ.
Ыстаныыга кини иккис буолла (32,37 м.), оттон мас тардыһыыга, хапсаҕайга уонна тааһы көтөҕүүгэ бастакы миэстэлэри ылла. Кинини тутум эргиир атахтаата, эдэр спортсмен 44 эргийэн, 23-с миэстэни ылла. Ох саанан ытыыга уонна 400 м сүүрүүгэ Решетников тохсус буолла.
Кыайыылаах Руслан Слепцовтан 10 очукуонан хаалла. Өскөтүн кини тутум эргииргэ, ох саанан ытыыга көрдөрүүлэрин тупсардаҕына, сэтинньи 28–29 күннэригэр Дьокуускайга буолар Дыгын оонньууларыгар бастакы сүүмэрдиир түһүмэххэ уопуттаах спортсменнарга улахан конкурент буолар кыахтаах.
«Былырыыҥҥа диэри ыйааһыным 103 киилэ кэриҥэ этэ. Кылгас кэм иһигэр 78 кг диэри түһэрдим. Многоборьеҕа соһуччу кэлбитим. Сунтаар улууһугар ыһыах кэмигэр Тимофей Большаков боруобалаан көрөрбөр сүбэлээбитэ. Онно бу спорт көрүҥэ миэхэ барсарын өйдөөбүтүм, эрчиллиилэри саҕалаабытым. Урут мас тардыһыынан эрэ дьарыктанарым. Саҕаланыытыгар ыарахан этэ, ыйааһыммын чугаһатарга анаан аччыктыырым. Бэҕэһээ ыстаныыга бэйэм көрдөрүүлэрбиттэн — 32 м — соһуйбутум. Дыгын оонньууларыгар кыттыахпын баҕарабын. Хаһан эрэ бу кэм кэлиэҕэ», — диэн Зафарджон Решетников кэпсээтэ.
