Саха сиригэр 2026 сылга уу суолун түмүгэ тахсан эрэр. СӨ гражданскай оборона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга министиэристибэтэ дааннайынан, билиҥҥи туругунан 958 тыһыынча туонна таһаҕас тиэйилиннэ, ол былаантан 94,9 % тэҥнэһэр. Туһанааччыларга быһаччы 924,6 тыһыынча туонна тиийдэ (91,6 % былаан кэриҥэ).
Билиҥҥи уу суолунан тиэйэн аҕалыы уоспай былаана 1009,5 тыһыынча туоннаҕа тэҥнэһэр.
Миниистир солбуйааччыта Никита Павлов бэлиэтээбитинэн, Аартыка улууустарыгар таһаҕаһы тиэйээһин ураты хонтуруолга ылыллар. Күн ахсын таһааччылары уонна таһаҕаһы ыытааччылары кытта мунньах ыытыллар. Бүтэһик көрсүһүүгэ таһаҕас таһыыны түмүктүүр дааннай биэрии уонна кыһыҥҥы кэмҥэ суудуна куттала суох сырыытын хааччыллыы соруктара бэрилиннилэр.
Бу дьылга Дьааҥы уонна Индигиир өрүстэр уулара түһэн, айан уустугурда. Ситэ тиийбэтэх таһаҕас тиэйиитин толуйар миэрэни ылыннылар: уматык уонна чох сорҕотун массыынанан кыһын тиэйэллэр. Билиҥҥи күҥҥэ кыһыҥҥы айан суолун арыйыахтарыгар дылы бары нэһилиэнньэлэр энергия саппааһынан хааччылыннылар.
Уус Куйга бөһүөлэгин хааччыйыы ураты болҕомто ууруллар. Өрүстэр уолан хаалбыттарыттан сылтаан, таһаҕаһы сөмөлүөтүнэн тиэйэллэр: бастакы рейс бэлиэр ыытыллынна, иккис – кэлэр нэдиэлэҕэ барар. Уу суолунан кыайан тиийбэтэх табаардары Тиксии пордугар ыытылынна.
Түмүктээн этэххэ, былааннаммыт 302,7 тыһыынча туоннаттан 285,5 тыһыынча туонна тиэйилиннэ.
