Саха сирин тустууга Виктор Яковлев бүгүн түүн Арассыыйа сүүмэрдэммит хамаандатын састаабыгар 24-гэр диэри саастаах юниордарга аан дойдуга бастыыр иһин күрэскэ кыттыытын саҕалыаҕа. Соторутааҕыта Лас-Вегас куоракка кыттааччылар сэрэбиэйдэрэ буолбутун, СИА иһитиннэрэр.
Виктор Яковлев 61 киилэҕэ диэри ыйааһыннаахтар бөлөхтөрүгэр тустуоҕа. Кини дойду чөмпүйэнээтин лиидэрин быһыытынан национальнай хамаандаҕа ыҥырыллыбыта.
Сэрэбиэй түмүгүнэн, саха тустууга күрэхтэһии алын чааһыгар түбэстэ. Кини квалификационнай түһүмэххэ бастакы утарылаһааччытынан Доминикан Өрөспүүбүлүкэтиттэн 23 саастаах Лите Максимилиан буолуоҕа.
Кыайар түгэнигэр кинини Арменияттан сылдьар Саргис Бегоян кэтэһэр. Кини былырыын 21-гэр диэри саастаах юниордарга Европа чөмпүйэнээтин кыайыылааҕа. Оччолорго кини Арассыыйаттан Адлан Сайтиевы 6:5 ахсаанынан кыайбыта.
Виктор Яковлев хапсыһыыларын алтынньы 17 күнүгэр, Дьокуускай бириэмэтинэн 2:30 чааска саҕалыаҕа. Уоскутар хапсыһыылар алтынньы 18 күнүгэр 2:30 чааска, оттон түмүк киирсиилэр сарсыарда 10 чааска буолуохтара.
