Өрөспүүбүлүкэҕэ тыа хаһаайыстыбатын салаатын судаарыстыба өйөөһүнүн бэлиитикэтэ салҕаныаҕа. Бу туһунан Саха сирин Ил Дархана Айсен Николаев быһа эпииргэ эттэ.
«Биһиги тыа хаһаайыстыбабыт бородууксуйатын хаачыстыбата олус үрдүк, экологическай өттүнэн ыраас. Ону биһиги бородууксуйабытын бэйэбит сатаан атыылыы үөрэнэ иликпит. Куруук сыаналары тэҥнии сатыыбыт, холобура, саха этин уонна тас эрэгийиэннэртэн аҕалыллыбыттары. Манна оҥоруу тиэхиньикэтэ туспа, этин хаачыстыбата эмиэ атын. Эбэтэр мүөтү буоллун: биһиги мүөппүтүн башкир мүөтүнээн сыаналарынан күрэстэһиннэрэ сатыыллар. Башкир мүөтэ — промышленнай оҥоруу, оҥоһуута атын. Биһиэхэ — от үүнэр сирэ ураты, ыраас тайҕа. Балык да буоллун: ыраас өрүстэргэ уонна күөллэргэ баарын таһынан, олус ыарахан үлэнэн бултанар. Мин биһиги балыксыттарбыт, сылгыһыттарбыт үлэлэрин олус сыаналыыбын, тоҕо диэтэххэ, кинилэр олус тыйыс айылҕалаах усулуобуйаҕа үлэлииллэр. Түөрт уон кыраадыс тымныыга, аныгы тэриллээх да буолларгын, хаар быыһынан уонунан килэмиэтири ааһан, илимнэртэн балыгы хостоон көр. Ол иһин тыа хаһаайыстыбатын өйөөбүппүт, өйүүбүт уонна өйүөхпүт. Бу биһиги бэлиитикэбит — дьиҥэ өйдөнүмтүө, өйдөнөр. Маны Саха сирин үгүс олохтооҕо өйүүрэ буолуо диэн бука эрэнэбин», — диэн Ил Дархан бэлиэтээтэ.
Кини эрэгийиэни аһынан-үөлүнэн куттала суох хааччыйыыга болҕомтотун уурда.
«Өскөтүн биһиги тыа хаһаайыстыбатынан дьарыктаммат буоллахпытына, барытын чугастааҕы эрэгийиэннэртэн эбэтэр атын дойдулартан аҕалыахпыт. Онтон ковид курдук дьаҥ балаһыанньата үөскээтэҕинэ хайдах буолабыт? Хааччахтанан олоруу кэмигэр, холобура, Кытай нөҥүө Арассыыйаҕа оҕуруот аһын тиэйии тута тохтотуллубута. Ол кэмҥэ «Саюри» сылаас дьиэлээх комплекса баар буолан, атын эрэгийиэннэргэ оҕуруот аһын сыаната хас да төгүл үрдээбит кэмигэр, биһиэхэ томат, оҕурсуу, үүнээйини бэйэбит оҥорон таһаараммыт, бу кэми этэҥҥэ аһарбыппыт», — диэтэ Айсен Николаев.
Тылбаас: Дария Сибирякова
