Физическэй култуураҕа уонна успуорка министиэристибэтин кэллиэгийэтин түмүктүүр мунньаҕар ахсынньы 17 күнүгэр Саха сирин норуоттарын X Спортивнай оонньууларын хаһаайынын быһаарыахтара. Билиҥҥи туругунан үс улуус хандьыдаатынан ааҕыллар, ол эрээри сайаапкалары хомуйуу салҕанар. Бу туһунан Успуорт министиэристибэтин пресс-сулууспата иһитиннэрэр, ЯСИА суруйар.
Оонньуулары ыытыыга сайаапкалары Мэҥэ Хаҥалас, Кэбээйи уонна Сунтаар улуустара биэрдилэр. Муниципалитеттартан сайаапкалары тутуу сэтинньи 16 күнүгэр диэри салҕаныаҕа.
«Улахан успуорт күрэхтэһиилэрэ дьону физическэй култууранан дьарыкка тардыыга саамай көдьүүстээх ньымалартан биирдэстэрэ буолаллар. Оонньуулары ыытар улууска бу успуорт инфраструктуратын сайыннарыыны түргэтэтэргэ, успуордунан дьарыкка саҥа усулуобуйалары тэрийэргэ уонна улуус туһунан иһитиннэриини үрдэтэргэ кыаҕы биэрэр. Эһиил Ньурба IX Спортивнай оонньууларга кыттааччылары уонна тэрийээччилэри көрсүөҕэ. Билигин улууска үс тыһыынча миэстэлээх сылаас чэпчэки атлетика манежтаах стадион, успуордунан доруобуйаны бөҕөргөтөр комплекс харбыыр бассейннаах, Антоновка сэлиэнньэтигэр 20 миэстэлээх тустуу саалалаах уонна интэринээттээх тутуллар. Ону тэҥэ Чаппанда сэлиэнньэтигэр «Бизнес-спринт» федеральнай бырайыак чэрчитинэн модульнай успуорт саалата тутуллар. Итини таһынан, өрөспүүбүлүкэтээҕи үтүө дьыалалар бырагыраамаларынан Сүлэ уонна Күндээдэ сэлиэнньэлэригэр модульнай успуорт саалалара тутуллаллар», — диэн физическэй култуураҕа уонна успуорка миниистир Леонид Спиридонов бэлиэтээтэ.
Маассабай успуорду сайыннарыы, успуорт инфраструктуратын модернизациялааһын уонна араас таһымнаах күрэхтэһиилэри ыытыы «Арассыыйа успуорда» судаарыстыбаннай бырагыраама соруктарыгар сөп түбэһэллэр.
