Дьокуускайга Саха АССР, РСФСР уонна ССРС үтүөлээх тириэньэрэ Дмитрий Коркин кэриэһигэр көҥүл тустууга норуоттар икки ардыларынааҕы күрэхтэһиини ыытыыга бэлэмнэнэллэр. Быйылгы турнир Монреаллааҕы Олимпиадаҕа саха спортсменнара Павел Пинигин, Роман Дмитриев уонна Александр Иванов кыайыыларын 50 сылыгар ананарын ЯСИА иһитиннэрэр.
Бүгүҥҥү күҥҥэ Дьокуускайга ыытыллар улахан турнирга уонтан тахса дойдуттан спортсменнар кытталларын бигэргэттилэр, ону тэҥэ Арассыыйа хас да эрэгийиэнин хамаандаларын бэрэстэбиитэллэрэ кыттыахтара.
Саха сирин сүрүн тустуу күрэҕэр биир нэдиэлэ кэриҥэ хаалла — сэтинньи 20–21 күннэригэр «Триумф» успуорт комплексыгар буолуоҕа.
Коркин кэриэһигэр турнир көбүөрүгэр Саха сирин хамаандатын лидердэрэ Лев Павлов, Константин Капрынов, Александр Авелов, Олег Фомин уонна да атыттар тахсыахтара.
Санатар буоллахха, былырыын саха тустуутун оскуолатын иитиллээччилэриттэн Лев Павлов, Виктор Рассадин, Олег Фомин, Ньургун Сергин уонна Никита Софронов кыһыл көмүс мэтээллэри ылбыттара. Дьоппуоннар Такара Суда уонна Рейджи Учида пьедесталга бастакы миэстэлэри ылбыттара. Ону тэҥэ Кемеровскай уобалас бэрэстэбиитэллэрэ Дмитрий Куприн уонна Константин Пшеничников кыайбыттара. Оттон 86 кг диэри ыйааһыҥҥа кыһыл көмүһү Азербайджантан Али Цокаев ылбыта.
