П.А. Ойуунускай аатынан Саха академическай тыйаатырыгар Саха Өрөспүүбүлүкэтин биллиилээх судаарыстыбаннай диэйэтэлэ Климент Иванов 90 сааһыгар аналлаах өрөспүүбүлүкэ уопсастыбаннаһын үөрүүлээх мунньаҕа буолан ааста.
Дьоро быһыыга-майгыга Ил Түмэн бэрэссэдээтэлэ Алексей Еремеев үбүлүөйдээх Климент Егоровичка өрөспүүбүлүкэ үрдүк судаарыстыбаннай наҕараадатын — «Хотугу сулус» уордьаны Саха сирин экэниэмикэтин сайыннарыыга уонна судаарыстыбаннаһын бөҕөргөтүүгэ уһулуччулаах үтүөлэрин иһин туттарда.
Климент Иванов — өрөспүүбүлүкэ норуотун хаһаайыстыбатын үтүөлээх үлэһитэ, «Бочуот бэлиэтэ», «Үлэ Кыһыл Знамятын», «Доҕордоһуу» уордьаннар кавалердара, СӨ бочуоттаах олохтооҕо, ону тэҥэ М.К. Аммосов аатынан судаарыстыбаннай бириэмийэ лауреата.
ССРС Үрдүкү Сэбиэтин XII ыҥырыытын, САССР Үрдүкү Сэбиэтин X, XI ыҥырыыларын, Саха АССР — Саха ССР Үрдүкү Сэбиэтин XII ыҥырыытын норуодунай дьокутаатынан, ону тэҥэ Ил Түмэн бастакы үс ыҥырыытын норуодунай дьокутаатынан буола сылдьыбыта. 1990–1992 сылларга Саха АССР — Саха ССР Миниистирдэрин Сэбиэтин бэрэссэдээтэлин, 1991–1993 сылларга Саха ССР Үрдүкү Сэбиэтин бэрэссэдээтэлин дуоһунаһын толорбута. 1993–1999 сылларга Арассыыйа бэрэсидьиэнигэр Саха сирин бастайааннай бэрэстэбиитэлинэн — өрөспүүбүлүкэ бастакы вице-премьеринэн үлэлээбитэ.
