НВК «Саха» — төрүт тыллары харыстыыга уонна сайыннарыыга лиидэр. Бу туһунан Саха Өрөспүүбүлүкэтин парламеныгар төгүрүк остуол кэмигэр этилиннэ. ЯСИА иһитиннэрбитинэн, Ил Түмэн култуураҕа уонна СМИ-гэ бастайааннай кэмитиэтэ көҕүлээбит мунньахха теле-араадьыйа хампаанньата өрөспүүбүлүкэ судаарыстыбаннай уонна официальнай тылларын өйүүргэ, эдэр көрөөччүлэргэ аналлаах контены оҥорууга оруолун туһунан кэпсэттилэр.
«Билигин «Саха» НКИХ — Арассыыйа саамай улахан регионнааҕы медиахолдина, «Саха» НКИХ, «Якутия 24», «Токко», «Мамонт» диэн түөрт телеханаалга, ону тэҥэ «Тэтим» араадьыйаҕа биэрии ыытар универсальнай лиссиэнсийэлээх», — диэн «Саха» НКИХ генеральнай дириэктэрэ Олег Марков иһитиннэрдэ.
Билигин «Саха» НКИХ нуучча, саха, дьүкээгир, эбээн, эбэҥки, долган, чукча тылларынан контены оҥорор.
«Биһиги ханаалларбыт сүрүн күүстэрэ төрүт тылы, култуураны уонна үгэстэри харыстыырга, сайыннарыыга туһуланар. Биэрии уонна цифровой ресурсалар өрөспүүбүлүкэ олохтоохторугар сонуннары, теле- уонна араадьыйа биэриилэри, быһа эпиирдэри, култуура нэһилиэстибэтин тириэрдэллэр», — диэтэ Саха Өрөспүүбүлүкэтин норуодунай дьокутаата.
Олег Марков регионнааҕы ханааллар рейтиннэринэн уонна көрүү өлүүтүнэн федеральнай биэриини куоһаралларын бэлиэтээтэ.
«Глобализация усулуобуйатыгар уонна аан дойду контенын сабардааһыныгар төрүт тылы консервация нөҥүө харыстыыр кыаллыбат. Хампаанньа бэлиитикэтэ төрүт култуураны систиэмэлээхтик саҥардыыга туһуланар, фольклор жанрдарын аныгы уонна наадалаах бородууксуйаҕа кубулутар», — диэтэ кини.
