Саха сиригэр хас да күн устата Красноярскай кыраайтан кэлбит циклоннартан сааскылыы сылаас уонна хаардаах күн-дьыл турар. Тымныйыы хаһан кэтэһиллэрин туһунан ЯСИА-ҕа Саха сиринээҕи УГМС начаалынньыгын солбуйааччы — Гидрометкиин начаалынньыга Татьяна Маршалик кэпсээтэ.
«Өрөспүүбүлүкэ киинигэр салгын температурата үлэ нэдиэлэтин бүтүөр диэри нуорматтан үрдүк буолуоҕа, түүн -20 кыраадыс иһинэн, күнүс -12…-17 кыраадыс иһинэн. Сынньалаҥ күннэригэр сөҥүү тохтуоҕа, Дьокуускайга түүн салгын температурата -30 кыраадыска чугаһыаҕа. Өрүс уҥуордааҕы улуустарга -33 кыраадыска диэри, күнүһүн -20…-25 кыраадыс иһинэн», — диэтэ ЯСИА-ҕа Татьяна Маршалик.
Нэдиэлэ бүтүүтэ хотугулуу-илин өттүгэр антициклон олохсуйан, түүн салгын температуратын -37…-42 кыраадыска диэри намтатыаҕа, оттон өрөспүүбүлүкэ киинигэр -25…-30 кыраадыс буолуоҕа.
Бүгүн, сэтинньи 12 күнүгэр, Дьокуускайга күнүс салгын температуратын -12…-14° иһинэн күүтэллэр. Кыра хаар түһүөҕэ, арҕааттан 2-7 м/с күүстээх тыал түһүөҕэ.
