Саха сиригэр Красноярскай кыраайтан кэлбит циклоннар сабардыыллар, нэдиэлэ бүтүөр диэри хаардаах уонна сылаас күн-дьыл туруоҕа. Өрөспүүбүлүкэ соҕуруулуу-арҕаа өттүгэр чугастааҕы күннэргэ салгын температурата 0…-5 кыраадыс буолуоҕа. Хайдах күн-дьыл туруоҕун туһунан ЯСИА-ҕа Саха сиринээҕи УГМС метеорологическай уонна агрометеорологическай билгэлээһин отделын начаалынньыга Саргылана Никитина кэпсээтэ.
«Быйыл нэдиэлэ устата Саха сирин арҕаа уонна соҕуруу өттүн аҥаардарыгар олус сылаас күн-дьыл туруоҕа. Саха сирин Красноярскай кыраайтан кэлбит циклоннар сабардыыллар. Дьокуускайга сылаас ордук муҥутаан бэҕэһээ буолбута уонна бүгүн салҕанар. Күнүһүн салгын температурата -10…-13 кыраадыс буолуоҕа. Үгүс улууска сэтинньи 11 күнүгэр кыра, соҕуруулуу-арҕаа уонна соҕуруу өттүгэр сорох сиринэн орто хаар түһүөҕэ. Тыал орто, соҕуруулуу-арҕаа уонна Арктика кытылыгар сорох сиринэн 9-14 м/с диэри күүһүрүө, тибии», — диэн Саргылана Никитина кэпсээтэ.
Сэтинньи 12-13 күннэригэр өрөспүүбүлүкэ үгүс өттүгэр кыра, арҕаа, соҕуруу сорох сиринэн орто хаар түһүөҕэ, тыал орто буолуоҕа.
Түүн салгын температурата -15…-20° буолуоҕа, халыннаҕына киин, арҕаа, соҕуруу өттүгэр -20…-25°, хотугулуу-илин -34…-39°. Арҕаа, соҕуруу хаардаахха -5…-10° эрэ буолуоҕа. Күнүһүн -13…-18°, хотугулуу-илин -22…-27°, арҕаа -5…-10°.
