Балаҕан ыйын 30 күнүгэр Арассыыйаҕа өйдөбүнньүк күн — Донецкай уонна Луганскай Норуодунай Өрөспүүбүлүкэлэр, Запорожскай уонна Херсонскай уобаластар Арассыыйа Бэдэрээссийэтин кытта холбоһууларын күнэ бэлиэтэнэр. Бу күн 2023 сыллаахха балаҕан ыйын 28 күнүгэр «Арассыыйа байыаннай албан аатын күннэрин уонна өйдөбүнньүк дааталарын туһунан» бэдэрээлинэй сокуоҥҥа киллэриллибит уларытыыларга сөп түбэһиннэрэн олохтоммута. Ол кэмтэн сыл аайы бэлиэтэнэр.
2022 сыллаахха Арассыыйа бэрэсидьиэнэ Владимир Путин уонна Донецкай уонна Луганскай норуодунай өрөспүүбүлүкэлэрин, Запорожскай уонна Херсонскай уобаластарын баһылыктара бу регионнар Арассыыйа састаабыгар киирэллэрин туһунан аан дойдутааҕы дуогабардарга илии баттаабыттара.
Бу күҥҥэ анаммыт тэрээһиннэр Саха сирин үрдүнэн ыытыллыахтара. Оскуолаларга кылаас чаастара уонна «Дьоһуннааҕы кэпсэтии», музейдарга быыстапкалар уонна экскурсиялар буолуохтара.
Дьокуускайга «Патриот» ыччат киинигэр «Биһиги дойдубут» викторина уонна лекция ыытыллыаҕа, «СВОими руками» баҕа өттүнэн кыттааччылар мастарыскыайдара аһыллыахтара, онно анал байыаннай дьайыы кыттыылаахтарыгар оҥоһуктары оҥорууга маастар-кылаастар буолуохтара.
А.Е. Кулаковскай аатынан норуоттар доҕордоһууларын дьиэтин лектордара киин куорат 26 № — дээх оскуолатыгар Арассыыйа норуоттарын сомоҕолоһууларыгар аналлаах уруогу ыытыахтара.
Санаттахха, Саха сирин дьоно саҥа субъектар Арассыыйа састаабыгар киирэр дьаһалларын өйүүргэ көхтөөхтүк кыттыспыттара. Өрөспүүбүлүкэ Арассыыйа Федерациятын саҥа субъектарын кытта бииргэ үлэлииргэ сөбүлэһиигэ илии баттаабыта, Донецкай Норуодунай Өрөспүүбүлүкэтигэр Кировское уонна Докучаевскай куораттары кытта шефтэһиигэ ылбыта. Бииргэ үлэлээһин кэмигэр бу куораттарга сүүһүнэн социальнай инфраструктура эбийиэктэрэ чөлүгэр түһэриллибиттэрэ, ол иһигэр медицина тэрилтэлэрэ, оскуолалар, спортивнай тутуулар, ону таһынан дьиэ-уот, суол-иис уонна пааматынньыктар.
Кировское куоракка 2023 сыллаахха Саха Өрөспүүбүлүкэтин офтальмологическай клиническэй балыыһатын филиала аһыллыбыта. Саха офтальмологтара 7 тыһыынчаттан тахса хатараахтаны ыраастыыр эпэрээссийэни уонна 30 тыһыынчаттан тахса консультацияны ыыппыттар.
