Арассыыйа ФСБ-тын Саха Өрөспүүбүлүкэтигэр үлэлиир управлениетын үлэһиттэрэ оперативнай дьаһаллар кэмнэригэр Алдан улууһуттан төрүттээх, сокуоннайа суох хостоммут кыһыл көмүһү батарар былааннаах киһини буллулар. Эр киһи массыынатыгар икки пластик холбукаҕа кыһыл өҥнөөх тимир булулунна. Кини быһаарбытынан, ити кыһыл көмүс, Томпо улууһун сиригэр лиссиэнсийэтэ суох ыарахан хайа техникатын уонна сууйар прибору туһанан хостоммут.
Экспертиза түмүгүнэн, чинчиллибит матырыйаал 800 кыраамтан тахса ыйааһыннаах, 10 мөлүйүөн солкуобайтан тахса сыаналаах кыһыл көмүс буоларын быһаарда. Бу түбэлтэнэн Саха Өрөспүүбүлүкэтин Томпо улууһугар Арассыыйа Ис дьыала министиэристибэтин отделениета холуобунай дьыаланы көбүттэ.
