“Хомунаалынай бөҕү кытта үлэлиир биэдэмистибэлэр икки ардыларынааҕы үлэлиир бөлөх мунньаҕар ахсынньы 1 күнүгэр диэри Бүлүү сүрүн суолугар уонна полигоҥҥа бөҕү хомуйар комплексы үлэҕэ киллэрэр соругу туруордум. 149 тыһыынча туонна күүстээх суортуур эбийиэк сыл иһигэр таҥан оҥоһулунна. Билигин, тэрилтэни үлэҕэ киллэрэр болдьоҕу кэспэккэ, хаалбыт үлэлэри түмүктүөххэ наада”, – диэн Айсен николаев МАХ-ханаалыгар суруйда.
Эбийиэккэ хомунаалынай бөҕү суортааһын тэриллиэҕэ. Бөх 30% кэриҥэ салгыы атыны оҥорууга ылыллыаҕа, ол көмөтүнэн мунньуу кээмэйэ көҕүрүөҕэ.
Куораттар уонна нэһилиэктэр ыраас буолуулара саҥа эбийиэктэри үлэҕэ киллэрииттэн эрэ буолбакка, бөҕү кэмигэр таһыыттан уонна контейнердаах болуоссаттар туруктарыттан тутулуктааҕын Айсен Николаев бэлиэтээтэ.
«Муниципалитеттар баһылыктарыгар болуоссаттары оҥорууга уонна контейнердары атыылаһыыга хантараахтары кэмигэр толороллорун хааччыйарга сорудахтаатым. Быйыл 83 болуоссат оҥоһулунна уонна 269 контейнер атыылаһылынна, оттон 2026 сыл ахсынньы 31 күнүгэр диэри бигэргэтиллибит сыллааҕы былаан тэрээһиннэрин түмүктүүр тоҕоостоох», — диэн Ил Дархан тоһоҕолоото.
Тылбаас: Саргылана Слепцова
