Саха сирин Үрдүкү суута Нерюнгри куорат суутун быһаарыытын оннунан хаалларда: анал байыаннай дьайыыга өлбүт байыас аҕата сөбө суох нэһилиэнньик быһыытынан билилиннэ. Кини билигин өлбүт байыас дьиэ кэргэнигэр анаммыт төлөбүрдэргэ уонна чэпчэтиилэргэ тиксиэ суоҕа.
Ирдэбили байыас ийэтэ биэрбит. Кини кэпсээбитинэн, кини урукку кэргэнэ кинилэр бииргэ олорор кэмнэригэр да, арахсыбыттарын кэннэ да уолларын иитиигэ кыттыбатаҕа. Алимены төлөөбөтөҕө, уолун олоҕун интэриэһиргээбэтэҕэ, кинини кытта сибээһи тутуспатаҕа. Кэргэнниилэр ыккардыларыгар мэлдьи этиһиилэр тахсаллара, эр киһи ойоҕор уонна оҕоҕо илиитин көтөҕөрө. Уол аҕатын кытта кэпсэппэтэҕэ, аҕа уолун төрөөбүт күнүнэн эҕэрдэлээбэтэҕэ, бэлэх биэрбэтэҕэ. Сыбаайбатыгар ыҥырбыта да — аҕата кэлбэтэҕэ.
Суукка туоһулар бигэргэппиттэр: аҕа уолугар харчынан көмөлөспөтөҕө, кинини ииппэтэҕэ, бэлэхтэри биэрбэтэҕэ.
Суут быһаарбытынан, эр киһи сокуоннай сааһын ситэ илик уолугар алимены төлөөһүҥҥэ иэстээх эбит. 2005 сыл балаҕан ыйыттан 2009 сыл балаҕан ыйыгар диэри иэһэ 198 580 солкуобай 20 харчы буолбут. Оттон 2008 сылга кини Арассыыйаттан барбытын кэннэ, алимены олох да төлөөбөт буолбут.
Суут бастакы инстанцията аҕаны сөбө суох нэһилиэнньигинэн билиммит уонна өлбүт байыас дьиэ кэргэнин чилиэннэригэр анаммыт төлөбүрдэргэ — страховой суумаларга, биирдэ бэриллэр босуобуйаларга уонна да атын өйөбүл миэрэлэригэр — быраабын быспыт. Ону таһынан киниттэн Нерюнгри оройуонун бүддьүөтүгэр 3 тыһыынча солкуобай госпошлинаны төлүүрүгэр уураахтаабыт.
Буруйданааччы быһаарыыны ааһына сатаабыт, ол эрээри Саха сирин Үрдүкү суутун гражданскай дьыалаларга кэллиэгийэтэ уларытыыта суох хаалларбыт. Быһаарыы сокуоннай күүһүгэр киирбит.
