2026 с. алтынньы 1 күнүттэн табаҕы уонна никотиннаах бородууксуйаны кууһунан уонна биирдиилээн атыылыырга лиссиэнсийэни көрдүөхтэрэ. Ол туһунан 186 №-дээх федеральнай сокуону 2026 с. бэс ыйын 26 күнүгэр ылыммыттара, суруйда Саха парламент саайт.
Кууһунан бэриллэр лиссиэнсийэни Росалкогольтабакконтроль, биирдиилээн атыыга эрэгийиэн былааһын уоргана биэриэҕэ. Өскөтүн табаҕы сокуоннай саастарын ситэ илик оҕолорго, тырааныспарга, оскуола таһыгар атыыга таһаардахтарына, лиссиэнсийэни сотоллор. Олохтоох былаас бэрэстэбиитэллэрэ уопсастыбанньыктары, көхтөөх дьону кытта оскуола уонна уһуйаан турар сирин кыраныыссатын кэмнээн, табах атыытын бопторуохтара. Сир кыраныыссатын быһаарар быраабыланы Бырабыыталыстыба бигэргэттэ.
Лиссиэнсийэни киллэрии саарбах табах атыытын хааччахтыа, көҥүлэ суох үлэлиир туочукалары сабыа, ону таһынан, сокуоннай саастарын ситэ илик оҕолору куһаҕан дьаллыктан көмүскүө.
Табаҕы атыылыыр урбаанньыттар лиссиэнсийэ ылалларыгар судаарыстыбаннай пошлина төлүөхтэрэ, ол туһунан 187 №-дээх федеральнай сокуону 2026 с. бэс ыйын 26 күнүгэр ылыммыттара алтынньы 1 күнүттэн олоххо киирэр. Табаҕы, никотиннаах бородууксуйаны атыылаһарга, харайарга, атыыга таһаарарга лиссиэнсийэ сыаната 800 000 солк. Биирдиилээн, эбэтэр тиэйэ сылдьан табаҕы атыылыырга бэриллэр лиссиэнсийэ, ол болдьоҕун уһатыы госпошлината сыл ахсын 20 000 солк. Ол туһунан «Парламентская газета» тустаах саайта иһитиннэрэр.
