«Сахафармация» хампаанньа Саха сиригэр чэпчэтиинэн туһанааччылары наадалаах эмтэринэн хааччыйыы былаан быһыытынан бара турарын туһунан биллэрдэ. Тыын суолталаах препараттар, ол иһигэр диабеттаах ыарыһахтарга инсулиннар, толору бааллар. «Чэпчэтиинэн туһанааччылар ылар наадалаах эмтэрэ барыта баар. Билигин кэлэр кыбаарталга уонна эһиилги бастакы кыбаарталга атыылаһыы дьаһала түмүктэнэн эрэллэр — бу былааннаах үлэ, быйыл чэпчэтиинэн туһанааччылар ахсааннара элбээбитинэн уонна препараттар испииһэктэрэ кэҥээбитинэн кыратык уһаата. Ол эрээри бу кыһалҕа буолбатах, үлэ хаамыыта. Саппаастан эмтэри биэрии харгыһа суох барар», — диэн «Сахафармация» генеральнай дириэктэрэ бэлиэтээтэ.
Хампаанньаҕа сыл бүтүөр диэри инсулиннар толору баалларын туһунан эттилэр. Искэн ыарыыларын, ревматологияны, пульмонологияны уонна да атын ыарахан ыарыылары эмтиир препараттары биэрии салҕанар. Эмтэр аптека ыскылаатын саппааһыттан бэриллэллэр.
РФ бырабыыталыстыбатын уурааҕынан, эмтэри уонна медицинскэй оҥоһуктары атыылаһыыга Арассыыйа оҥоһугун бородууксуйата өрө тутуллар. Аптекаларга номнуо Арассыыйа тиэстэрэ баар буоллулар.
«Өскөтүн чэпчэтиинэн туһанааччыга Арассыыйа оҥоһуулаах глюкометр суох буоллаҕына, «Сахафармация» ханнык баҕарар аптекатыгар сакаастыан уонна босхо ылыахха сөп. Бу биһиги ыарыһахтарбытыгар олохторун чэпчэтэр суолталаах саҥаны киллэрии», — диэн Рехлясов быһаарда.
Федеральнай бырагыраамалар харгыһа суох үлэлииллэр, оҕолор уонна өрөспүүбүлүкэ Арктикатын оройуоннарын олохтоохторо эмтэринэн урукку эрэсииминэн хааччыллаллар.
Саха сирин доруобуйа харыстабылын министиэристибэтэ уонна «Сахафармация» АУо күн аайы өрөспүүбүлүкэ бары аптекаларыгар эмтэр баалларын кэтээн көрөллөр. Исписэлиистэр тиэрдээччилэр хантараактары толорууларын хонтуруоллууллар уонна наада буоллаҕына аптекалар икки ардыларыгар препараттары суһаллык үллэрэн, биир да ыарыһах наадалаах эмэ суох хаалбатын курдук дьаһайаллар.
