СӨ Судаарыстыбаннай Мунньаҕар (Ил Түмэҥҥэ) үлэ ырыынагын уларыйыытыгар каадыр хааччыллыытын туһунан бырабыыталыстыба чааһа буолан ааста. Тэрээһини парламент социальнай бэлиитикэҕэ, үлэҕэ уонна дьарыктаах буолууга сүрүн кэмитиэтин бэрэссэдээтэлэ, норуот дьокутаата Алёна Атласова салайан ыытта, суруйда Саха парламент саайт.
Барыллааһынынан, 2032 сылга диэри өрөспүүбүлүкэ экэниэмикэтигэр каадырга наадыйыы 550 тыһыынчаттан тахса киһиэхэ тиийиэҕэ. Ордук доруобуйа харыстабылын, тырааныспар, сир баайын хостуур уонна үөрэхтээһин эйгэлэригэр исписэлиистэр ирдэниллиэхтэрэ. Каадырга наадыйыы үгүс аҥаара орто анал үөрэхтээх үлэһиттэргэ уонна 38 %-на үрдүк үөрэхтээх исписэлиистэргэ тиксиэҕэ.
Сүрүн дакылааты СӨ нэһилиэнньэ дьарыктаах буолуутугар судаарыстыбаннай кэмитиэтин бэрэссэдээтэлэ Светлана Горюшинская оҥордо. Кини үлэ ырыынага улахан уларыйыылары ааһарын бэлиэтээтэ: биир эйгэлэргэ дьарыктаах буолуу кыччыа, атыттарга — улахан инвестиционнай бырайыактары уонна саҥа технологиялары олоххо киллэриигэ улаатыаҕа. Кини этэринэн, бастатан туран, эргиэҥҥэ дьарыктаах буолуу намтыаҕа, тоҕо диэтэххэ маркетплейстар сайдаллар.
Норуот дьокутааттара өрөспүүбүлүкэҕэ каадыр кыаҕын сайыннарыыга сыһыаннаах ыйытыылары биэрдилэр.
СӨ Судаарыстыбаннай Мунньаҕын бэрэссэдээтэлин солбуйааччы Афанасий Владимиров үөрэх тэрилтэлэрин уонна үлэ биэрээччилэри кытта бииргэ үлэлэһиигэ туһаайыллыбыт идэҕэ хайысхалыыр бырайыактары олоххо киллэрии туһунан ыйыталаста.
Наукаҕа уонна үөрэхтээһиҥҥэ сис кэмитиэт бэрэссэдээтэлэ Антонина Григорьева педагог каадырдар ордук математика, физика уонна алын кылаас учууталларын тиийбэт буолуулара баарын, ону тэҥэ саҥа технология хайысхаларыгар исписэлиистэри бэлэмнээһин боппуруоһугар болҕомтону уурда.
Сир боппуруоһугар, айылҕа баайыгар уонна экологияҕа сис кэмитиэт бэрэссэдээтэлэ Андрей Находкин үлэтэ суох буолуу билиҥҥи таһымын уонна дьарыктаах буолуу сулууспатын үлэтигэр Оҥоһуу өй технологияларын туһаныы туһунан ыйытыылары биэрдэ.
Култуураҕа уонна маассабай иһитиннэрэр сириэстибэлэргэ сис кэмитиэтин бэрэссэдээтэлэ Вячеслав Куличкин Анал байыаннай дьайыы кыттыылаахтарын үлэҕэ ылыы уонна муниципальнай тэриллиилэргэ тыа хаһаайыстыбатын үлэһиттэригэр каадырга наадыйыы боппуруостарын таарыйда.
Доруобуйа харыстабылын сис кэмитиэтин бэрэссэдээтэлэ Светлана Давыдова доруобуйа харыстабылыгар каадыр тиийбэтин, ол иһигэр көрөр-харайар көмөлөһөөччүлэр суохтарын, ону тэҥэ ирдэнэр үөрэх бырагыраамаларын испииһэгин кэҥэтэр наадатын болҕомтоҕо ылла.
