Ааспыт нэдиэлэҕэ буолбут ытыыга норуоттар икки ардыларынааҕы турнирга 180-тан тахса бастыҥ снайпер кытынна. Күрэхтэһиини төрдүс төгүлүн үрдүк тэрээһиннээхтик ыыттылар диэн Саха сирин баһылыга Айсен Николаев, күрэхтэһии түмүктэрин таһаарарыгар эттэ.
Быйылгы турнирга дойду араас эрэгийиэннэриттэн 187 профессионал уонна 20-тэн тахса судьуйа кытынна. Бастакытын Беларусь хамаандата кытынна, ити тэрээһиҥҥэ норуоттар икки ардыларынааҕы статусту биэрдэ. Күрэхтэһиини Арассыыйа Дьоруойа, РФ оборонаҕа миниистирин солбуйааччы Юнус-Бек Евкуров кэтээн көрдө.
«Күнүскү ытыыга бэртээхэй рекорд олохтонно — биһиги дойдубутугар маннык таһымнаах күрэхтэһиилэргэ биир бастыҥ көрдөрүү — 3 биэрэстэни биһиги спортсменнарбыт Василий уонна Сергей Яковлевтар таптылар. Биллэн турар, анал сорудахтаах күүстэр, Бэрэсидьиэн куттала суох буолуутун сулууспата, Федеральнай харабыл сулууспата, атын да быраабы араҥаччылыыр уорганнар, ону тэҥэ анал байыаннай дьайыыттан кэлбит байыаннайдар өттүлэриттэн олус үрдүк күрэстэһии баара. Маннык усулуобуйаҕа биһиги уолаттарбыт кыайан эрэ буолбакка, олус суолталаах рекорду олохтоотулар. Мин кинилэри ис сүрэхпиттэн эҕэрдэлиибин. Улахан ситиһиилэри баҕарабын», — диэн Айсен Николаев «Быһа кэпсэтии» биэриигэ эттэ.
Айсен Николаев Арассыыйа Бэрэсидьиэнин боломуочуйалаах бэрэстэбиитэлэ, дойду бырабыыталыстыбатын бэрэссэдээтэлин солбуйааччы Юрий Трутнев эрийэн, Саха сирин олохтоохторун үрдүк көрдөрүүлэринэн турнир түмүгүнэн эҕэрдэлээбитин эттэ.
Быйыл эмиэ аан бастаан уолаттарга уонна кыргыттарга кыра калибрдаах бинтиэпкэнэн ытыыга дьоҕус турнир ыытылынна. Уһук Илин эрэгийиэннэриттэн уон биир хамаанда кытынна. Кыайыылаахтарынан магаданнар таҕыстылар, иккис миэстэни амурдар, үсүһү — Бурятия. Кэлэр сылга бу күрэхтэһиини тупсарар былааннаахтар.
