Муоста тутуутун үлэтэ өрүс сүнньүгэр тутуллар. Ол туһунан Ил Дархан Айсен Николаев быһа эпииргэ иһитиннэрдэ.
“Өлүөнэ муостата өрүс сүнньүгэр тутулла турарын биһиги биллэриэхпитин сөп. Икки сүрүн уонна улахан коффердамнар нуомнуо турдулар. Билигин олор истэригэр сыбаайа туруораллар. Тутааччылар кыраапык быһыытынан үлэлииллэр”, – диэн Айсен Николаев бэлиэтээтэ.
Өлүөнэ муостатыгар икки коффердамы өрүс сүнньүгэр туруордулар – бу уустук технология Арассыыйаҕа муоста тутуутугар бастакытын туттуллар. Балар истэригэр үүттүүр массыыналар үлэлииллэр, 920 сыбаайаттан 300 кэриҥэ саайалынна. Күн ахсын 500 тахса киһи уонна 70 тиэхиньикэ үлэлиир.
Салгыы олус эппиэтинэстээх сүһүөх: вантовай муоста сыбаайаламмыт акылаатын түмүктэниитэ уонна “Лена” бэдэрээлинэй трасса диэки буор кутуутун салҕааһына буолар. Уустук килиимэттээх услуобуйаҕа үлэ чопчу баран иһэр.
Өлүөнэ муостата – Саха сирин өрүһүн туорааһын эрэ буолбатах. Бу дойду киинин кытта Охотскай байҕал кытылын холбуур логистика сүһүөҕэ буолар. Кытай уонна Арассыыйа Арктикатын холбуур Мохэ – Найба дойду икки ардынааҕы тырааныспар көрүдүөрэ буолар кэскиллээх.
Дойду бэрэсидьиэнэ Владимир Путин быһа сорудаҕынан бырайыак олоххо киирэр уонна “Олох инфраструктурата” национальнай бырайыак флагмана буолар. Саха Сирин экэниэмикэтин уонна олоҕун эрэ буолбакка, бүтүн Уһук Илин туругун уларытыыга эбийиэк тутуллар.
Тылбаас: Саргылана Слепцова
