Россия кинематографистарын Союһун (ФПРК) эрэгиэннэр кинематографы өйүүр Пуонда көмөтүнэн уһуллубут Дмитрий Давыдов «Маут» драмата хас да тас дойдулар киинэ бэстибээллэрин бырагырааматыгарр көрдөрүллүөҕэ.
Турцияҕа хартыынаны Bosphorus International Film Festival кыттыылаахтара уонна ыалдьыттара көрүөхтэрэ, Германияҕа – International Short Film Festival Berlin, Мексикаҕа – Author International Film Festival чэрчитинэн, Швецияҕа – Umeå Filmfestival, Францияҕа – International Short Film Festival of Aix-en-Provence – Festival Tous Courts. Ону тэҥэ киинэ Чечен Өрөспүүбүлүкэтигэр «Дахар» диэн омуктар икки ардыларынааҕы үгэс буолбут киинэ бэстибээлигэр көрдөрүллүөҕэ. Бэстибээллэр бары сэтинньи уонна ахсынньы ыйдарга ыытыллыахтара.
«Маут» диэн эбэҥки таба иитээччилэрин дьиэ кэргэнин устуоруйата. Сюжет быһыытынан эдэр киһи аҕата бэйэтин дьыалатын – табаны иитиини — биэрэр баҕатын утаран, куоракка үлэлии барарга быһаарынар. Бу дьиэ кэргэн тус трагедията буолар.
«Мин санаабар, хотугу норуоттар үлэлэрин үгэс буолбут көрүҥнэрин харыстааһын боппуруоһа хаһан да буоларын курдук сытыытык турар: ыччат куораттарга барар, бэйэтин тылынан саҥарарын тохтотор, култууратын кытта ситимин сүтэрэр. Бу Россия киинэтигэр киэҥник этиллибэтэх улахан кыһалҕалар курдук», — диэн Дмитрий Давыдов бэлиэтээтэ.
Устуу Алдан оройуонун Хатыстыыр сэлиэнньэтигэр ыытылынна. Сүрүн оруоллары олохтоох дьон – Сергей Степанов, Ярослав Кузьмин, Лидия Енохова толордулар.
