Улуустааҕы кииннэммит библиотечнай ситим бары нэһилиэктэри хабан үлэни ыытар. Библиотека специалистара нэһилиэнньэ ааҕар таһымын үрдэтиигэ эрэ буолбакка гражданскай быраабы билиигэ, судаарыстыбаннай өҥөлөрү ылыыга, аныгы технологиялары, көмпүүтэри баһылыырга тирэх буолаллар. Горнайдааҕы Петр Аввакумов аатын сүгэр киин библиотека концепция суруйан, улахан күрэҕи ааһа 15 мөл солк кэриҥэ федеральнай үптэн, өрөспүүбүлүкэттэн 150 тыһыынча, улуустан 1 мөл 260 т өйөбүл көрүллэн аныгылыы дизайннаах улахан өрөмүөн үлэтэ ыытылынна. Ону таһынан анал миэбэл, тиэхиньикэ кэллэ, эбии 1300 тахса кинигэ пуонданы хаҥатта.
Киин библиотека иһинэн «Ситим» сайдар киин төрөөбүт түөлбэлэрин инники сайдыытыгар туруулаһар, саҥа санаалары саҕар көхтөөх олохтоохтор санаа атастаһалларыгар туһулаан тэриллибитэ. Горнай улууһа өрөспүүбүлүкэҕэ граннарга кыттыыга бары улуустартан хаһыс да сылын үрдүк көрдөрүүлээх. Уопсайа Горнайга араас федеральнай уонна регионнааҕы күрэстэртэн грант быһыытынан 100-тэн тахса мөлүйүөн солкуобай киирбит.
Национальнай бырайыак чэрчитинэн Бэрдьигэстээххэ оҕо модельнай бибилиотеката ааспыт сылга бастыҥ үлэтинэн Бүтүн Россиятааҕы куонкурус кыайыылаахтарын ахсааныгар киирэн, «Дьиэ кэргэн» бэрэсидьиэн национальнай бырайыагын чэрчитинэн сайдыыга субсидия ылан саҥа технологиянан, тупсарыллыбыт дьиэҕэ оҕолору үөрдэр.
Аныгы олох хаамыытынан тыа сиригэр библиотека диэн кинигэ эрэ уларсар сир буолбакка, дьон-сэргэ, оҕо-аймах мустар, саҥаны билэр уонна айар-тутар биир сүрүн интеллектуальнай киинэ буола сайынна.
Бу курдук киэҥ далааһыннаах федеральнай бырагыраамалар олоххо киириилэрэ тыа сирин инники сайдыытын уонна кэскилин түстүүллэр.
