Сэтинньи 13 күнүгэр, Саха Өрөспүүбүлүкэтин бастакы бэрэсидьиэнэ Михаил Николаев төрөөбүт күнүгэр, «Билиинэн кыайыаҥ» диэн судаарыстыбаннай истипиэндьийэни туттарыы үөрүүлээх сиэрэ-туома буолла. Бу бириэмийэни аҕыс лауреат ылла, кинилэр истэригэр устудьуоннар, педагогтар уонна оскуола оҕолоро бааллар.
«Биһиги эспиэрдэрбит Сахабыт сирин салгыы ааттатар, дьоһуннаах оҕолору таллылар. Бу бириэмийэ оҕолорго уонна педагогтарга саҥа билиини ыларга көмөлөһөр. Ону салгыы үөрэххэ уонна сайдыыга туһаныахха сөп. Биһиги, өрөспүүбүлүкэ салалтата, Саха Өрөспүүбүлүкэтин бастакы бэрэсидьиэнэ Михаил Николаев бириинсиптэрин тутуһарга кыһаллабыт. Оҕо эрдэхтэн улаатан эрэр көлүөнэ, Михаил Ефимович курдук, тылынан уонна дьыаланан дьон, ырааҕы көрөр дьоҕурдаах буоларыгар баҕарабыт», — диэтэ Саха сирин баһылыгын уонна бырабыыталыстыбатын дьаһалтатын салайааччыта Георгий Михайлов.
Наҕараадаламмыттар ортолоругар — Сунтаардааҕы политехническай лиссиэй-интэрин 11 кылааһын үөрэнээччитэ Давид Зорин баар. «Бу миэхэ умнуллубат түгэн, бириэмийэ миэхэ салгыы сайдарбар көҕүлээһини биэрэр. Истипиэндьийэни мин мэдиссиинэ бырайыакпар үлэм түмүгүнэн биэрдилэр. Мин туустаах хосторунан интэриэһиргээн, ону уларытан, оҥоһуу муора микрокилиимэтин оҥорорго быһаарыммытым. Бу өйүк олус үчүгэй эбит, мин бу дьыаланан номнуо 3–4 сыл дьарыктанабын. Биһиги — хоту дойду дьоно, йод курдук микроэлеменнар тиийбэттэр. Ол иһин мин маннык бырайыагы оҥорорго быһаарыммытым, оччоҕуна саха дьоно щитовиднай былчархай кыһалҕатын билиэ суохтара дии саныыбын. Мин үрдүк таһымнаах үөрэххэ киирэр баҕалаахпын уонна идэбин геннай инженерияны кытта ситимнииргэ ыраланабын», — диэн кэпсээтэ Давид Зорин.
2026 сыллааҕы истипиэндьийэ лауреаттара:
— Дьокуускай куорат лиссиэйин 10 кылааһын үөрэнээччитэ Елизавета Гаврильева;
— М.К. Аммосов аатынан ХИФУ магистратуратын 2 кууруһун устудьуона Сардана Борисова;
— Физико-техническай лиссиэй физикаҕа учуутала Аида Харлампьева;
— Саха сирин Наукаларын кыра академиятын эбии үөрэхтээһинин педагога Николай Николаев;
— Атамай оскуолатын дириэктэри солбуйааччы Татьяна Павлова;
— Муусука үрдүкү оскуолатын старшай преподавателэ Елена Михеева;
— Доцент, Москватааҕы «Үрдүкү экэниэмикэ оскуолата» Национальнай чинчийэр университет Пинскай аатынан үөрэхтээһин киинин уопсай уонна эбии үөрэхтээһиҥҥэ сүрүн эспиэрэ Алексей Обухов;
— Сунтаардааҕы политехническай лиссиэй-интэрин 11 кылааһын үөрэнээччитэ Давид Зорин.
Ыспыраапка: Истипиэндьийэни 2002 сыллаахха Михаил Николаев олохтообута. Кини сыала-соруга — педагогическай маастырыстыбаны уонна саҥаны киллэриини көҕүлээһин, дьоҕурдаах уонна талааннаах оҕолорго өйөбүлү оҥоруу, уопсастыба айар күүһүн, эниэргийэтин уонна дьулуурун өрөспүүбүлүкэ кэскилин туһугар түмүү. 2026 сылга 112 сайаапка киирбититтэн, 52-тэ — оскуола оҕолоро, 15-һэ — устудьуоннар, 45-һэ — Саха сирин үөрэх, култуура уонна ускуустуба тэрилтэлэрин педагогтара. Сайаапкалар өрөспүүбүлүкэ 19 муниципальнай улууһуттан, куораттааҕы уокуруктарыттан уонна үөрэх уонна наука, култуура уонна духуобунай сайдыы министиэристибэлэрин биэс бас бэринэр тэрилтэлэриттэн киирдилэр.
