2027 сыл тохсунньутуттан бары оскуолаларга оҥоһуу өй кууруһа киллэриллэрэ былааннанар. Бу туһунан үөрэҕирии министиэристибэтин пресс-сулууспатыгар сигэнэн РИА Новости иһитиннэрэр.
2026/27 үөрэх дьылын иккис чиэппэриттэн пилотнай оскуолалар 5–11 кылааһын үөрэнээччилэригэр «Оҥоһуу өй уонна информационнай куттал суох буолуута» диэн дьарык кууруһа киллэриллиэҕэ. Бары оскуолалары 2027 сыл тохсунньутуттан хабар былаан баар.
Куурус булгуччулаах буолуоҕа уонна «Суолталаах кэпсэтиилэр» курдук оскуола былааныгар киириэҕэ.
Саҥа куурус оҕолорго оҥоһуу өй хайдах үлэлиирин, кини билимҥэ, экологияҕа, медицинаҕа, үөрэхтээһиҥҥэ уонна бырамыысыланнаска оруолун туһунан толору өйдөбүлү биэрэргэ, ону тэҥэ ОӨ-технологиялары кытта куттала суох алтыһарга үөрэтэргэ аналлаах.
Саҥа оскуола кууруһун улахан сорҕото интернет-түөкүннээһини утары охсуһууга, ол иһигэр ОӨ туһанар ньымалары киллэрэн туран, ананыаҕа.
