Цзянси провинциятын (Кытай Норуодунай Өрөспүүбүлүкэтэ) доруобуйа харыстабылын кэмитиэтин дэлэгээссийэтэ Дьокуускайга икки күннээх үлэтин түмүктээтэ. Бу туһунан Саха Өрөспүүбүлүкэтин Тас сибээскэ уонна норуоттар дьыалаларыгар министиэристибэтэ иһитиннэрдэ.
Дэлэгээссийэ састаабыгар киирдилэр: Цзянси провинциятын доруобуйа харыстабылын кэмитиэтин бэрэссэдээтэлэ Ван Жэньхуэй, медицинскэй үлэни салайыы отделын начаалынньыга Хуан Чжидэ, Цзянсийскайдааҕы традиционнай Кытай медицинэтин университетын Уопсастыбаннай доруобуйа харыстабылын эйгэтигэр үөрэхтээһин уонна медицинскэй өҥөлөр кииннэрин дириэктэрэ Фу Юн, Цзянси провинциятын дьахталлар уонна оҕолор доруобуйаларын харыстабылын киинин баартыйа кэмитиэтин сэкирэтээрэ Ли Цзэнмин уонна Цзянси провинциятын Онкологическай балыыһатын баартыйа кэмитиэтин сэкирэтээрэ Сюй Бинь.
Сырыы кэмигэр дэлэгээссийэ Саха Өрөспүүбүлүкэтин Доруобуйа харыстабылын министиэристибэтин салалтатын кытта көрүстэ, М.Е. Николаев аатынан 1 №-дээх Өрөспүүбүлүкэтээҕи балыыһа — Медицина национальнай киинин уонна Дьокуускайдааҕы өрөспүүбүлүкэтээҕи онкологическай диспансеры көрдө-иһиттэ.
Сырыы сүрүн сыала — медицинскэй көмөнү тэрийиигэ уопут атастаһыы, онкологияҕа, дьахталлар уонна оҕолор доруобуйаларын харыстааһыҥҥа, медицинскэй үөрэхтээһиҥҥэ уонна традиционнай медицинаҕа бииргэ үлэлэһиини сайыннарыы, ону тэҥэ Саха сирэ уонна Цзянси провинция доҕордуу сибээстэрин бөҕөргөтүү.
