Нэһилиэнньэни сэрэтэр систиэмэлэри былааннаахтык уонна киэҥ далааһыннаахтык бэрэбиэркэлээһин алтынньы 9 күнүгэр, бээтинсэҕэ, Саха сиригэр ыытыллыаҕа, диэн ЫБММ сэрэтэр.
Саха сирин бары улуустарыгар, ыраах сытар нэһилиэнньэлээх пууннары киллэрэн туран, олохтоох бириэмэнэн 10:40 чааска электро-сиреналары уонна улаханнык саҥарар тэриллэри холбуохтара. Ону таһынан, 10:43 чааска Арассыыйа үрдүнэн булгуччулаах уонна барыларыгар аһаҕас тэлэбиисэринэн ханааллар уонна араадьыйа ыстаансыйаларын биллэриинэн солбуйуу ыытыллыаҕа: экраҥҥа уонна эпииргэ Арассыыйа ЫБММ-тин иһитиннэриитэ тахсыаҕа.
ЫБММ эрэгийиэннээҕи управлениета өрөспүүбүлүкэ олохтоохторугар туһаайар: сирена тыаһын иһиттэххитинэ, уоскуйуохха уонна уолуйуо суохха наада, тэлэбиисэри (ханнык баҕарар аһаҕас ханаалы) эбэтэр араадьыйаны холбоон иһитиннэриини истиэххэ наада, ону тэҥэ «МЧС России» мобильнай сыһыарыыга иһитиннэрии тиэкиһин билсиэххэ наада.
Сэрэтэр систиэмэ айылҕа уонна техногеннай төрүөттээх ыксаллаах быһыы-майгы куттала эбэтэр үөскээһинэ билиннэҕинэ нэһилиэнньэҕэ сибээс сигналын кэмигэр тиэрдэргэ аналлаах.
