«Модун» успуорт комплексыгар алтынньы 10–11 күннэригэр үгэс буолбут өрөспүүбүлүкэтээҕи «Саҥа ааттар» мас-рестлинг турнира ыытыллыаҕа. Бу күрэхтэһиигэ сыллата саҥа саҕалааччылар кытталлар уонна улахан таһымҥа тахсар кыахтаналлар, диэн ЯСИА иһитиннэрэр.
Турнирга саҥа саҕалааччы эрэ спортсменнар кытталлар. Успуорт маастардара, өрөспүүбүлүкэтээҕи уонна Арассыыйатааҕы турнирдар кыайыылаахтара, призердара күрэхтэһэр бырааптара суох. Онон саҥа саҕалааччыларга улахан күрэс мэтээллэрин ылан, бэлиэтэнэр кыах арыллар.
Саха сирин мас тардыһыытыгар федерацията бэлиэтииринэн, бу турнир сылын аайы мас-рестлинг саҥа сулустарын арыйар. Бу түһүлгэттэн элбэх биллэр спортсмен тахсыбыта, кинилэр кэлин Саха сирин чөмпүйэнээттэрин призердарынан буолаллар.
Кыттааччылары ыйааһыннааһын уонна сэрэбиэйдээһин алтынньы 9 күнүгэр буолуоҕа. Алтынньы 10–11 күннэригэр мэтээллэр оонньонуохтара.
Бастыҥнары дьахталларга 50, 55, 60, 65, 70, 75 уонна 75 кг үөһээ, ону тэҥэ эр дьоҥҥо 55, 60, 65, 70, 75, 80, 85, 90, 105 уонна 105 кг үөһээ ыйааһыннарга быһаарыахтара.
