Дьокуускай — Аллараа Бэстээх хайысханан салгын олбохтоох суудуналар бу нэдиэлэ бүтүүтэ — барыллаан алтынньы 16 күнүттэн үлэлиэхтэрэ. Бу туһунан «Ленаводсервис» хампаанньа салайааччыта Борис Строев ЯСИА-ҕа иһитиннэрдэ.
«Билигин “подушкалар” өрөмүөннэрэ күүскэ бара турар. Биир ый үлэлииргэ, биһиги суудуналарбытын алта ый өрөмүөннүүбүт. Алтынньы 15–16 чыыһылатыгар диэри сайыҥҥы катердар сүүрүөхтэрэ. Кыдьымах турдаҕына, салгын олбохтоох суудуналарбытын ууга таһаарыахпыт. Бастаан 10–12 суудунаны үлэлэтиэхпит. Аҕыйах хоноот, бүтүн биригээдэни», — диэн Строев иһитиннэрдэ.
Кини быйыл тарыыптар урукку таһымҥа хаалыахтара — биир пассажиры 2500 солкуобай диэн бэлиэтээтэ.
«Өрүскэ муус элбээтэҕинэ уонна аэроботтарга көһүү буоллаҕына, сыана 5000 солк. диэри үрдүөҕэ. Балаһыанньа көннөҕүнэ эмиэ 2500 солк. түһүөҕэ. Былырыыҥҥы курдук», — диэн кэпсэтээччи бэлиэтээтэ.
Саҥа сезоҥҥа барыта 28 салгын олбохтоох суудуна туһаныллыаҕа, кинилэр 204-с микрооройуоҥҥа «Намыв» ыстаансыйаҕа баазаланыахтара.
