Алтынньы 10-12 күннэригэр Өлүөнэ өрүс Сангаар – Эдьигээн учаастагар муус туруута саҕаланна: Сангаарга — нуорматтан 2 хонук эрдэ, Эдьигээҥҥэ — 2 хонук хойут. Бу туһунан Саха сиринээҕи УГМС иһитиннэрэр.
Өлүөхүмэ улууһугар Маача гидропоһугар алтынньы 1 күнүгэр кыдьымах билиннэ — ортотунан хас сыл аайы буолар даататтан 4 хонук эрдэлээтэ. Хатыҥ-Тумул – Иһит учаастагар муус кытыылаабыта бэлиэтэнэр.
Алдан өрүскэ Томмот туһаайыытынан нуормаҕа чугас болдьоххо муус көһүннэ. Уус-Майа улууһугар Белькачи – Уус-Миль учаастагар муус кытыылаабыта көстөр. Охотскай Перевоз гидропоһугар, Томпо улууһугар, кытаанах муус үөскээһинэ нуорматтан 2 хонук эрдэ саҕаланна.
Алдан салааларыгар — Учур (Чүлбү) уонна Маайа (Чабда) — алтынньы 1 күнүгэр чараас муус уонна кыдьымах бэлиэтэнэр, ортотунан хас сыл аайы буолар даататтан 1 хонук эрдэ. Амма өрүс устатын тухары орто уонна хойуу кыдьымах салҕанар.
Бүлүү өрүскэ, Бүлүү куоракка, үгэс буолбут болдьоххо сэдэх кыдьымах көстөр, аллараа сүүрүгүнэн Кэбээйи улууһугар кыдьымах салҕанар. Өлөөн өрүскэ, Өлөөн сэлиэнньэтигэр, муус бүрүөһүнэ нуорматтан биир нэдиэлэ хойут үөскээтэ. Дьааҥы өрүс төрдүгэр, Нижнеянскай бөһүөлэккэ, муус туруута, ортотунан хас сыл аайы буолар даататтан, 4 хонук хойутаата.
Халыма өрүскэ, Орто Халыма куоракка, муус алтынньы 10 күнүгэр көһүннэ — үгэс буолбут болдьохтон 2 хонук хойут.
