Саха сиригэр 2017 сыл тохсунньу 1 күнүгэр диэри саахалланар туруктааҕынан билиниллибит олорор дьиэ пуондатыттан дьону көһөрүү бырагырааматын бастакы түһүмэҕэ түмүктэнэн эрэр. Бу улахан үлэ барыллаан түмүктэрин өрөспүүбүлүкэ баһылыга Айсен Николаев «Россия 24» ханаалга «Быһа кэпсэтии» биэриигэ алтынньы 12 күнүгэр билиһиннэрдэ.
«Кэлиҥҥи сылларга 1 мөлүйүөн кв.м. тахса иэннээх дьиэ-уот көһөрүлүннэ. 55 тыһыынчаттан тахса киһи саҥа дьиэни ылан, көстө», — диэтэ Айсен Николаев. Билиҥҥи туругунан 2025 сылга диэри суоттаммыт өрөспүүбүлүкэтээҕи сыаллаах бырагыраама 98% туолла.
Билиҥҥи түһүмэх түмүктэммитин кэннэ, Саха сирэ бырагыраама иккис түһүмэҕэр киирэр, ол 2017 сыл тохсунньу 1 күнүн кэнниттэн саахалланар туруктаахтар испииһэктэригэр киирбит дьиэлэри хабыаҕа. Өрөспүүбүлүкэ баһылыга олорор дьиэ пуондатын саҥардыыга улахан үлэ күүтэрин бэлиэтээтэ.
Саҥа саахалланар туруктаах дьиэлэри көһөрүүгэ наадыйыыны толору сабарга эбии үбүлээһин наада. Бүддьүөт туруга тупсар түгэнигэр, федеральнай уонна өрөспүүбүлүкэ бүддьүөттэрин суотугар эргэ дьиэлэри көтүрүү уонна дьоҥҥо саҥа кыбартыыралары биэрии тэтимин түргэтэтэр былаан баар.
2025–2028 сылларга суоттаммыт саҥа өрөспүүбүлүкэтээҕи сыаллаах бырагыраама чэрчитинэн, Саха сиригэр эбии 8,6 тыһыынча киһини 1,2 тыһыынчаттан тахса элбэх кыбартыыралаах дьиэттэн көһөрөр былааннанар.
