Ыйааһыны түһэрэргэ бурдук аһыттан толору аккаастаныахха наада диэн быһаарыы доруобуйаҕа буортулаах буолуон сөп, тоҕо диэтэххэ килиэпкэ элбэх туһалаах эттиктэр бааллар диэн РИА новостига мэдиcсиинэ билимин хандьыдаата, диетолог-быраас, терапевт, бэдэрээлинэй чинчийэр киин аһылык, биотехнология уонна аһылык куттала суох буолуутун иммунология лабораториятын научнай үлэһитэ Татьяна Солнцева иһитиннэрдэ.
“Ыйааһыннарын түһэриэн баҕарар дьоҥҥо биһиги бурдук астары толору туоратыахтарын наадатын туһунан хаһан даҕаны эппэппит. Ыйааһыны ханнык баҕарар аһылыгы муҥура суох сиэтэххинэ эбиэххэ сөп. Туһалаах килиэп, төттөрүтүн, ырарга туһалыан сөп”, – диир Солнцева.
Кини этэринэн, ырарга сиэбит килокалорийгыттан элбэҕи ороскуоттуохха наада. Маны таһынан, туһалаах эттиктэринэн баай килиэп куртах аһы буһарарыгар, оһоҕос микробиотатыгар уонна метаболизмҥа үчүгэйдик дьайарын кини бэлиэтиир.
“Өскөтүн биһиги туһалаах килиэби элбэҕи сиэтэхпитинэ, ыйааһыммытын эбэбит, тоҕо диэтэргин онно углевод эмиэ баар”, – диэн бэлиэтээтэ.
Тылбаас: Саргылана Слепцова
