Дьокуускай — Аллараа Бэстээх хайысханан сайыҥҥы тарыып алтынньы ортотугар диэри үлэлиирэ былааннанар. Гидрологическай балаһыанньа уустугурдаҕына сайыҥҥы тарыып оннугар быстах сезон тарыыбын киллэриэхтэрэ диэн «Паромы Якутии» тэрилтэ иһитиннэрэр.
Сэтинньиттэн Жатай — Төхтүр хайысханан таһаҕаһы тиэйии «ЛОРП» мууһу алдьатар ледоколлаах оҥоһуллар буолуоҕа. Манна тарыып сыаната уларыйар. СӨ тырааныспар министиэристибэтигэр иһитиннэрбиттэринэн, быйылгы сыллааҕы навигация үлэтэ түмүктэммитин кэнниттэн тарыып сыаната судаарыстыба өттүттэн хонтуруолламмат — сыананы илдьэр-аҕалар дьон олохтууллар.
Өрүһү туоруур суол сабылыннаҕына пассажирдары салгын олбохтоох суудуналар уонна аэроботтар таһыахтара. Сүрүн хайысхаларга 30-35 суудуна үлэлиэҕэ, ол иһигэр 25 суудуна Дьокуускай — Аллараа Бэстээх хайысхаҕа үлэлиэҕэ.
