Саха сирэ Аҕа дойду Улуу сэриитин сылларыгар сэриилэспит снайпердар үгэстэрин тутан хаалбыт. Бу туһунан ТАСС-ка вице-премьер — РФ Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ, Ф. М. Охлопков аатынан сыллата ыытыллар аһаҕас аан дойдутааҕы үрдүк таһымнаах ытыы турнирын сүрүн судьуйата Юрий Трутнев иһитиннэрдэ.
«Саха сирэ — туспа тиэмэ. Кинилэр маладьыастар. Саамай сүрүнэ — кинилэр Аҕа дойду Улуу сэриитин сылларыгар сэриилэспит үтүө снайпердар үгэстэрин тута сылдьаллар, ол иһин кинилэргэ улахан махтал», — диэтэ кини.
Ф. М. Охлопков аатынан сыллата ыытыллар аһаҕас аан дойдутааҕы үрдүк таһымнаах ытыы турнира алтынньы 9–11 күннэригэр Дьокуускайга буолан ааста. Фёдор Охлопков — 234-с стрелковай полк снайпера. Кыһыл Армияҕа — 1941 сыл балаҕан ыйыттан, ол сыл ахсынньы 12 күнүттэн — фроҥҥа. 1944 сыл бэс ыйын 23 күнүгэр диэри сержант Охлопков снайперскай бинтиэпкэттэн 400-тэн тахса гитлеровскай саллааты уонна эпписиэри суох гыммыта. 1945 сыл бэс ыйын 24 күнүгэр Кыайыы Парадыгар Кыһыл болуоссакка кыттыбыта.
