Сэтинньи ыйтан Арассыыйаҕа, ол иһигэр Саха сиригэр, хас даҕаны категориялаах дьоҥҥо биэнсийэлэрэ үрдүөҕэ. Урукку өттүгэр лүөччүгүнэн уонна шахтерунан үлэлээбит дьон, 80 саастарын туолбуттар, ону тэҥэ иитиилэригэр оҕолоох биэнсийэлээхтэр эбии төлөбүрү ылыахтара. Бу туһунан “Парламентская газета”суруйар.
Лүөччүктэр уонна шахтердар
Сэтинньи 1 күнүттэн гражданскай авиация сөмөлүөттэрин экипажтарын чилиэннэригэр уонна таас чох бырамыысыланнаһын үлэһиттэригэр ыйга бэриллэр эбии төлөбүр саҥаттан суоттаныаҕа, суруйда Саха сирэ саайт.
Судаарыстыбаннай Дуумаҕа Үлэҕэ уонна социальнай бэлиитикэҕэ кэмитиэтин бэрэссэдээтэлин бастакы солбуйааччыта Светлана Бессараб быһаарарынан, бу харчы судаарыстыба бүддьүөтүттэн буолбакка, үлэ биэрээччилэр страховой пуондаларыттан төлөнөр. Эбии төлөбүр кээмэйэ киһи хас сыл үлэлээбититтэн уонна үлэ биэрээччи төһө харчыны укпутуттан тутулуктаах. Маннык суоттааһын сылга түөртэ оҥоһуллар.
80 саастарын туолбуттарга уонна I группалаах инбэлииттэргэ
2026 сыл алтынньы ыйга 80 сааһын туолбут уонна маҥнайгытын I группалаах инбэлиит буолбут дьоҥҥо биэнсийэ страховой чааһыгар төлөбүр икки төгүл улаатыаҕа.
2026 сылга төлөбүр кээмэйэ 9 584 солкуобай 69 харчыга тэҥнэһэр. Ол аата, сэтинньиттэн үөһэ этиллибит дьон 19 169 солкуобай 38 харчыны ылар буолуохтара.
Манна эбии харчы биир эрэ төрүөтүнэн төлөнөр. Өскөтүн киһи инбэлиит буолан эбии харчыны ылар буолбут буоллаҕына, 80 сааһын туоларыгар иккиһин эбиллибэт. Харчы Социальнай пуонданан аптамаатынан суоттанар, туспа сайабылыанньаны суруйар наадата суох.
Оҕолоохторго
Бэйэлэрин көрүүлэригэр-истиилэригэр кыаммат аймахтардаах, холобур, 18 сааһын туола илик оҕолоох эбэтэр сиэннээх биэнсийэлээхтэргэ эмиэ эбии харчы көрүллэр.
Биир оҕо иһин чопчу төлөбүр үс гыммыт бииригэр тэҥнэһэр харчы эбиллэр. Оттон икки оҕолооххо — икки төгүл, үс уонна онтон элбэх оҕолооххо чопчу төлөбүр 100% толору төлөнөр. Үксүгэр харчы биэнсийэни маҥнай оҥорторорго бэриллэр. Оттон өскөтүн оҕону биэнсийэҕэ тахсыбытын кэннэ иитэр буолбут буоллаҕына, Социальнай пуондаҕа сайабылыанньа биэриэххэ наада.
Үлэтин тохтотон, сынньалаҥҥа тахсыбыттарга
Сэтинньигэ соторутааҕыта үлэлэрин тохтотон, дьиҥнээхтик сынньалаҥҥа тахсыбыт кырдьаҕастар эмиэ үрдэтиллибит биэнсийэни ылыахтара.
Санатан эттэххэ, 2016 сылтан 2024 сылга диэри үлэлиир биэнсийэлээхтэр биэнсийэлэрэ индексацияламмат этэ. Ол эрээри, киһи үлэтин тохтоотоҕуна эрэ, ол ааспыт сылларга оҥоһуллубатах индексациялар барыта холбонон, биэнсийэтэ дьэ үрдээн кэлэр. Бу суоттааһын эмиэ аптамаатынан оҥоһуллар.
