Саха сиригэр 14-c Арассыыйа Дьоруойа баар буолла, кини анал байыаннай дьайыы кэмигэр хорсун быһыытын иһин бу үрдүк ааты сүктэ. Үрдүкү судаарыстыбаннай наҕарааданы Александр Егорович Находкиҥҥа туттардылар. Бу туһунан өрөспүүбүлүкэ баһылыга Айсен Николаев MAX ханаалыгар иһитиннэрдэ.
Александр Егорович 2014 сылтан Донбааска баҕа өттүнэн барбыта. Анал байыаннай дьайыы кэмигэр Артемовскай иһин кыргыспыта, рота уонна батальон хамандыырынан сулууспалаабыта, разведка начаалынньыгынан үлэлээбитэ. Бааһырыылары уонна контузиялары аахсыбакка, байыаннай сорудахтары толорбута. «Вагнер» ЧВК-ҕа сулууспалаан баран, Арассыыйа Оборуонатын министиэристибэтин анал салаатын бойобуой суолун салҕаабыт. Александр Егорович үс «Хорсунун иһин» уордьанынан уонна үс «За отвагу» мэтээлинэн наҕараадаламмыт.
Александр Егорович эһэтэ, Сэбиэскэй Сойуус Дьоруойа Николай Чусовской, Зееловскай үрдэллэри штурмалааһыҥҥа көрдөрбүт хорсун быһыытын иһин үрдүк ааты сүкпүтэ. Александр Егорович сулууспатынан төрөөбүт дойдуга тапталы уонна иэскэ бэриниилээх буолууну көлүөнэттэн көлүөнэҕэ тиэрдэр бойобуой дьиэ кэргэн үтүө үгэстэрин чиэстээхтик салҕаата.
«Александр Егоровичка Арассыыйа Дьоруойа ааты иҥэриинэн өрөгөйдөөхтүк эҕэрдэлиибин! Бу — хорсун быһыы, тулуур уонна Ийэ дойдуга бэриниилээх буолуу дьиҥнээхтик сыаналаммытын бэлиэтэ. Дьиэ кэргэнигэр чэгиэн доруобуйаны, күүһү-уоҕу уонна этэҥҥэ буолууну баҕарабын. Саха сирэ киэн туттар!» — диэн Николаев суруйда.
