2027 сылга Саха сиригэр оройуон коэффициеннарын уонна хотугу эбии ааҕыылары учуоттаан, хамнас алын кээмэйэ (МРОТ) маннык буолуоҕа:
— 1-кы зонаҕа — 72 300 солкуобай
— 2-с зонаҕа — 81 018 солкуобай
Бу туһунан бүгүн, алтынньы 15 күнүгэр, Ил Түмэҥҥэ аһаҕас истиилэргэ Саха Өрөспүүбүлүкэтин үбүн миниистирин эбээһинэһин толорооччу Иван Алексеев иһитиннэрдэ. Истиилэргэ «2027 сылга уонна 2028-2029 сылларга былааннанар кэмҥэ Саха Өрөспүүбүлүкэтин судаарыстыбаннай бүддьүөтүн туһунан» 445-7 №-дээх Сокуон барылын дьүүллэстилэр.
Иван Алексеев этэринэн, 2027 сыл тохсунньу 1 күнүттэн Арассыыйаҕа МРОТ 6,8% үрдүүр.
“2027 сыл тохсунньу 1 күнүттэн МРОТ үрдээһинигэр үп көрүлүннэ. МРОТ үрдээһинэ дойду бэрэсидьиэнин ыам ыйынааҕы ыйааҕар олоҕуран, доруобуйа харыстабылын, үөрэхтээһини, социальнай эйгэни уонна култуураны сайыннарыыга туһуланар”, — диэтэ Алексеев.
Кини бэлиэтээбитинэн, быйыл тохсунньу 1 күнүттэн МРОТ Саха сиригэр 16% тахса үрдээбит. Ол курдук, өрөспүүбүлүкэ судаарыстыбаннай бүддьүөтүттэн үбүлэнэр тэрилтэлэр үлэһиттэригэр, муҥутуур «хотугу» эбии ааҕыыны (80%) учуоттаан:
— Оройуон коэффициена 1,7 — 67 733 солкуобай
— Оройуон коэффициена 2,0 — 75 861 солкуобай
