«Якутия» авиахампаанньа Дьокуускай – Усть-Нера хайысханан көтүүнү сөргүттэ. 2026 сыл күһүн-кыһын кэмигэр билиэт атыыта номнуо аһылынна. Бу олохтоох аэродром көтөр-түһэрэр балаһатыгар (ВПП) чөлүгэр түһэрэр үлэ толору түмүктэммитин кэнниттэн кыалынна. Бу туһунан Саха сирин тырааныспар министиэристибэтэ иһитиннэрэр.
ВПП бүрүөһүнүн итэҕэстэрин туоратыы үлэтэ 2026 сыл балаҕан ыйын 25 күнүгэр түмүктэннэ. Тэрээһиннэр кэннилэриттэн аэропорт инфраструктуратын нуормаҕа эппиэттиир турукка аҕалылынна уонна көтөр ааллары, ол иһигэр Bombardier Dash 8 Q300 сөмөлүөттэри, куттала суох ыларга бэлэм буолла.
Уус-Ньараны кытта тырааныспар сибээһин чөлүгэр түһэрии туһунан ыйытыы соторутааҕыта өрөспүүбүлүкэ баһылыга Айсен Николаевтыын «Быһа лииньийэ» кэмигэр киирбитэ. Санатар буоллахха, көтүү Федеральнай авиационнай быраабылаларга сөп түбэһиннэрэн балаҕан ыйын 1 күнүттэн быстах кэмҥэ тохтотуллубута. Бу дьаһал көтүү куттала суох буоларын хааччыйар сыалтан, намыһах турар двигательтардаах сөмөлүөттэри туһанарга бүрүөһүнү суһаллык өрөмүөннүүр наадатыттан ылыллыбыта.
Алтынньы маҥнайгы дэкээдэтигэр көтүү дьиҥнээхтик сөргүтүллэригэр кыра техническай тардыллыы авиахампаанньа сөмөлүөтүн шасситыгар наадалаах компонены кэтэһииттэн тахсыбыта. Бүгүҥҥү күҥҥэ бары техническэй боппуруостар быһаарылыннылар уонна авиатаһааччы бигэргэтиллибит расписаниены толорорго төнүннэ.
Пассажирдар 2026 сыл күһүн-кыһын көтүү расписаниетыгар сөп түбэһиннэрэн, «Якутия» авиахампаанньа официальнай саайтыгар эбэтэр атыы каассаларыгар билиэт атыылаһыахтарын сөп.
