Арассыыйа Бэрэсидьиэнэ Владимир Путин көҕүлээбит «Куттала суох хаачыстыбалаах суоллар» уонна «Олох-дьаһах инфраструктурата» национальнай бырайыактар чэрчилэринэн, 2019–2026 сылларга Саха сиригэр 21 муоста тутулунна эбэтэр саҥардылынна диэн Саха Өрөспүүбүлүкэтин Суолларын салалтата иһитиннэрэр.
Муосталар уопсай уһуннара 2 442,27 погонай миэтэрэҕэ тэҥнэһэр.
Тэрилтэ бэлиэтииринэн, муосталары саҥардыы дьаһаллара өрөспүүбүлүкэ нэһилиэнньэлээх пууннарын икки ардыларыгар тохтоло суох тырааныспар сибээһин хааччыйаллар, суол быраабылатын тутуһууну үрдэтэллэр уонна ыраах сытар сирдэр олохтоохторугар социальнай эбийиэктэргэ киирэри табыгастаах оҥороллор. Суол ааһар сирдэринэн элбэх уу мэһэйэ баарынан, саҥардыллыбыт муосталар эрэгийиэн тырааныспар инфраструктуратын сайыннарыыга сүрүн оруолу ылаллар.
Санатар буоллахха, 2026 сылга «Олох-дьаһах инфраструктурата» национальнай бырайыагынан Саха сиригэр 95 кэриҥэ килэмиэтир суолу нуормаҕа эппиэттиир турукка аҕалыы былааннанар. Үлэлэр Дьокуускай, ону тэҥэ Алдан, Ленскэй, Мииринэй уонна Нерюнгри куораттарыгар ыытыллаллар.
2025 сылга национальнай бырайыагынан өрөспүүбүлүкэҕэ 130,69 килэмиэтир массыына суола, ол иһигэр 109,47 килэмиэтир өрөспүүбүлүкэ таһымнаах, киллэрилиннэ.
