Нэһилиэнньэлээх пууннарга хотугу таһаҕас 96%-на тиэрдилиннэ. Өрүстэринэн кыайан тиэллибэтэҕи кыһыҥҥы суолларынан аҕалыахтара. Бу туһунан «Якутия 24» ханаалга «Якутия, вперед!» биэриигэ ый түмүгүн таһаарарыгар өрөспүүбүлүкэ баһылыга Айсен Николаев иһитиннэрдэ.
«Бүгүҥҥү күҥҥэ тиэрдиллиэхтээх таһаҕас 96%-на нэһилиэнньэлээх пууннарга тиэрдилиннэ. Ол аата, кыһыҥҥы суол аһыллыар диэри улуустарга туох да кыһалҕа суох», — диэтэ кини.
Баһылык быйыл Индигир өрүскэ кыһалҕалар үөскээбиттэрин бэлиэтээтэ. Бу гидрология уонна түгэҕи дириҥэтэр үлэлэр хойутаан саҕаламмыттарынан сибээстээх, ол содулугар суудуналар мунньустубуттар.
«Тиэллибэтэҕи кыһын аҕалыахпыт. Манна балаһыанньа өйдөнөр, хомойуох иһин, сорох кээмэйи кыһыҥҥы суолунан аҕаларбытыгар тиийэбит. Манна сүрүн сорук — бу таһыы кэмигэр саҕаланара уонна үбүлээһининэн хааччыллара, тустаах сорудах бэрилиннэ», — диэтэ Айсен Николаев.
Маны таһынан, Саха сирин баһылыга кыһыҥҥы суол аһыллыар диэри уматык ресурсалара барыта толору тиэрдиллибиттэрин тоһоҕолоон бэлиэтээтэ.
