«Арктика суоллара» тэрилтэ 2026/2027 сыллардааҕы кыһыҥҥы суоллары арыйыы барыллаан болдьоҕу бигэргэттэ. Суол хайысхаларынан бэлэмнээх уонна уйуктаах буолуутун (10, 20 уонна 30 туоннаҕа диэри) учуоттаан, түһүмэхтэринэн арыллыахтара.
Ахсынньы 1 күнүттэн «Дьааҥы» айан суолун Иван-Сирэ — Баатаҕай-Алыта учаастагар, Дьарҕалаахха уонна Кустуурга киирии суолларга, Үөһээ Дьааҥы тумнар суолларыгар, ону тэҥэ «Усть-Куйга — Депутатскай — Белай Хайа» айан суолун Депутатскай — Уйаанди учаастарыгар 10 туоннаҕа диэри уйуктаах тырааныспарга суол арыллыаҕа. Ахсынньы 4 күнүттэн — «Кириэстэр» айан суолун Усть-Куйга — Казачье учаастагар (10 туоннаҕа диэри). Ахсынньы 10 күнүттэн — 20 туоннаҕа диэри уйуктаах тырааныспарга «Муома» айан суолугар уонна Иван-Сирэ — Баатаҕай-Алыта учаастагар.
2026 сыл ахсынньы бүтүүтэ 20 туоннаҕа диэри уйуктаах тырааныспарга «Арктика», «Дьааҥы», «Индигир», «Сэбээн», «Булуҥ» уонна «Алаһыай» айан суолларын үгүс учаастактарыгар суол арыллыаҕа. Ол курдук, ахсынньы 25 күнүттэн — «Арктика» сорох учаастактарыгар, ахсынньы 30 күнүттэн — «Дьааҥы» уонна «Индигир» айан суолларыгар.
2027 сыл тохсунньу-олунньу ыйдарыгар 30 туоннаҕа диэри уйуктаах тырааныспарга суол арыллыаҕа: тохсунньу 12 күнүттэн — «Үөһээ Дьааҥы», «Кириэстэр» уонна «Муома» айан суолларыгар, тохсунньу 25 күнүттэн — «Дьааҥыга», тохсунньу 29 күнүттэн — «Арктика» уонна «Индигир» сорох учаастактарыгар.
Суоллар арыллар болдьохторо барыллаан буолалларын уонна муус дьиҥнээх туругун, күн-дьыл усулуобуйатын учуоттаан уларыйыахтарын сөбүн, «Арктика суоллара» тэрилтэҕэ бэлиэтээтилэр.
