Сыл саҕаланыаҕыттан өрөспүүбүлүкэ нэһилиэнньэтин дьарыктаах буолуутун сулууспатын нөҥүө анал байыаннай дьайыы 261 кыттыылааҕа уонна байыаннай сулууспалаахтар дьиэ кэргэттэрин 123 чилиэнэ үлэҕэ киирдилэр. 85 киһи, ол иһигэр 75 байыаннай дьайыы бэтэрээнэ, үлэ ырыынагар ирдэнэр идэлэргэ үөрэнэ сылдьаллар. Бу туһунан алтынньы 27 күнүгэр брифиҥҥэ СӨ нэһилиэнньэ дьарыктаах буолуутун киинин дириэктэрин солбуйааччы Айтал Керемясов иһитиннэрдэ.
«СӨ нэһилиэнньэтин дьарыктаах буолуутун сулууспата анал байыаннай дьайыы кыттыылаахтарын уонна кинилэр дьиэ кэргэттэрин дьарыктаах буолууга өйөөһүҥҥэ систиэмэлээх үлэни салгыыр. Ааспыт кэмҥэ анал байыаннай дьайыы 1047 кыттыылааҕар уонна кинилэр 355 чугас дьонугар судаарыстыба өйөбүлүн миэрэлэрин туһунан иһитиннэрии оҥоһулунна, 575 киһиэхэ, ол иһигэр 401 анал байыаннай дьайыы кыттыылааҕар, сөптөөх үлэни көрдүүргэ көмө оҥоһулунна», — диэтэ Айтал Керемясов.
Кини этэринэн, квоталаах үлэ миэстэлэригэр бойобуой дьайыыларга кыттыбыт 2152 бэтэрээн, ол иһигэр 1359 анал байыаннай дьайыы бэтэрээнэ үлэлииллэр. «В кругу СВОих» кулууп чэрчитинэн кыттыылаахтары көҕүлээһин уонна дьарыктаах буолуу боппуруостарын быһаарыы үлэтэ салҕанар. Ол курдук, алтынньы 22 күнүгэр «Куттал суох буолуута уонна харабыллааһын» диэн тэрээһин ыытылынна, ол чэрчитинэн бойобуой дьайыылар бэтэрээннэригэр чааһынай харабыл идэтигэр үөрэтиигэ маастар-кылаастар, ЧОП, норуот дружиналарын тэрийиигэ сүбэлэр, быраабы араҥаччылыыр эйгэҕэ үлэ биэрээччилэри кытта кэпсэтиилэр тэрилиннилэр. Ону тэҥэ анал байыаннай дьайыы кыттыылаахтара бу эйгэҕэ үлэҕэ киирэр туһунан ыйытыктарыгар хоруйдары иһиттилэр.
