Саха сирин баһылыгын «Айта» цифровой көмөлөһөөччүтэ сыл саҕаланыаҕыттан өрөспүүбүлүкэ олохтоохторуттан 2 248 суругу ылбытыттан, 157-тэ — саха тылынан. Бырайыагы сайыннарыы сүрүн хайысхаларыттан биирдэстэрэ — саха тылын өйөөһүн буолар. Билигин олохтоохтор цифровой көмөлөһөөччүгэ төрөөбүт тылларынан ыйытыыларын биэриэхтэрин сөп.
Сиэрбиһи сыыппараҕа көһөрүү үлэтэ Арассыыйа Бэрэсидьиэнэ Владимир Путин көҕүлээбит «Экономика данных и цифровая трансформация государства» национальнай бырайыак чэрчитинэн ыытыллар.
Систиэмэ сахалыы саҥаны билэр, көрдөһүүлэри ырытар уонна салгыы үлэҕэ аналлаах биэдэмистибэлэргэ ыытар. Ыраах нэһилиэктэр олохтоохторугар төрөөбүт тылларынан сыыппара сулууспаларын кытта кэпсэтэр кыах ордук суолталаах.
«Биһиэхэ төрөөбүт, саха тылынан ыйытыы биэрэр, санааны этэр кыах баара суолталаах. Сааһырбыт дьон бары аныгы технологиялары сатаан туттубаттар, онон оҕо эрдэхтэн үөрэммитинэн саҥарар быдан табыгастаах. Маннык кыах баар буолан иһэрэ үчүгэй, биһигини төрөөбүт тылбытынан өйдүүллэр», — диэн Амма улууһун Абаҕа сэлиэнньэтин олохтооҕо, биэнсийэлээх Иван Адамов бэлиэтээтэ.
Цифровой көмөлөһөөччүнү сайыннарыыга Саха Өрөспүүбүлүкэтин Инфокоммуникационнай технологиялар өрөспүүбүлүкэтээҕи киинин уонна М.К. Аммосов аатынан ХИФУ Оҥоһуу Өй лабораториятын исписэлиистэрэ үлэлииллэр.
«Айта» быһа сибээс бүппүтүн да кэнниттэн суруктары салгыы ылар. Өрөспүүбүлүкэ олохтоохторо 8 (4112) 510-000 нүөмэринэн цифровой көмөлөһөөччүгэ эрийэн, ыйытыахтарын эбэтэр кыһалҕаларын туһунан нууччалыы да, сахалыы да этиэхтэрин сөп, суруйда Саха Өрөспүүбүлүкэтин бырабыыталыстыбатын МАХ-ханаала.
