Саха сиригэр алтынньы 22 күнүгэр биэс саҥа модульнай быраас амбулаториятын биир кэмҥэ астылар — Уус Алдан улууһун Бэйдиҥэ, Үөһээ Бүлүү улууһун Боотулуу, Нам улууһун Кириэс Кытыла, Ньурба улууһун Чаппанда сэлиэнньэлэригэр уонна Дьокуускай куорат Марха микро-оройуонугар. Тэрээһиҥҥэ видеонан сибээс эрэсииминэн өрөспүүбүлүкэ баһылыга Айсен Николаев кытынна.
«Мин хас биирдии олохтоох өрөспүүбүлүкэҕэ хаачыстыбалаах мэдиссиинэ көмөтүн кэмигэр ыларын туһугар — киин куоракка да, ыраах сэлиэнньэҕэ да — суолталаах», — диэн эрэгийиэн баһылыга тоһоҕолоон бэлиэтээтэ.
Биэс амбулатория бары бастакы сүһүөх мэдиссиинэ көмөтүн оҥорорго аныгы оборудованиенан хааччыллыбыт. Манна быраастар үлэлииллэригэр уонна ыарыһахтары көрсөллөрүгэр табыгастаах усулуобуйалар тэриллибиттэр. Холобур, Мархаҕа улахан дьоҥҥо уонна оҕолорго туспа процедурнай уонна быһыы биэрэр хостор көрүллүбүттэр.
Биэс эбийиэги тутууга уонна хааччыйыыга Арассыыйа Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыак чэрчитинэн 91,8 мөлүйүөн солкуобай көрүллүбүт.
«2018 сылтан биһиги Саха сиригэр 130-тан тахса доруобуйа харыстабылын эбийиэгин — онкология уонна кардиология курдук саамай улахан кииннэртэн саҕалаан, саамай ыраах нэһилиэктэргэ баар биэлсэр-акушер пууннарыгар тиийэ — үлэҕэ киллэрдибит. Дьон наадалаах көмөнү дьиэлэрин таһыгар ыларын туһугар, миэстэтигэр мэдиссиинэни салгыы сайыннарыахпыт», — диэтэ Айсен Николаев.
Өрөспүүбүлүкэ баһылыга саҥа амбулаториялары тэрийиигэ кыттыбыт дьоҥҥо барыларыгар махталын биллэрдэ уонна быраастарга, мэдиссиинэ кэлэктииптэрин үлэһиттэригэр ураты махталын тиэртэ.
