Саха Өрөспүүбүлүкэтин Судаарыстыбаннай Мунньаҕын (Ил Түмэн) XX уочараттаах пленарнай мунньаҕар дьокутааттар «СӨ сиригэр-уотугар никотиннаах электроннай систиэмэлэри уонна никотиннаах электроннай систиэмэлэргэ аналлаах убаҕастары биирдиилээн атыылааһыны бобор туһунан» 421‑7 №-дээх Сокуону ылыннылар.
Сокуон сүрүн сыалынан өрөспүүбүлүкэ нэһилиэнньэтин, ол иһигэр сокуоннай саастарын ситэ илик оҕолору, доруобуйаларын харыстааһын буолар. Сокуон барылын дьүүллэһии кэмигэр, вейптары туһанааччылар 45%-н оҕолор ылаллара, вейпка тардыһыы ордук 15 саастарыгар үрдүүрэ бэлиэтэммит. Амтан биэрэр эбиликтэр никотиҥҥа күүстээх ылларыыга уонна тыынар уорганнар ыарыылара үөскүүллэригэр төрүөт буолаллар.
Дакылаатчыт, парламеннааҕы урбаан уонна туризм бастайааннай кэмитиэтин бэрэссэдээтэлэ Алексей Корнилов иһитиннэрбитинэн, бобуу убаҕас төрүттээх никотины электроннай систиэмэлэргэ (вейптарга) уонна олорго аналлаах убаҕастарга тарҕанар. Сэбирдэхтээх табаҕы сылытар электроннай тэриллэр бу сокуон дьайыытыгар хабыллыбаттартар.
Киирэр хааччахтааһын кэмэ — 2027 сыл кулун тутар 1 күнүттэн 2032 сыл кулун тутар 1 күнүгэр диэри. Маннык хааччахтары олохтуур быраап Арассыыйа субъектарыгар бэдэрээлинэй сокуонунан көрүллэр.
