2027 сылга Губинскай уокурук Дьокуускайга мас дьиэлэрэ суох бастакы территория буолуоҕа. Хаалбыт икки мас дьиэ сыл бастакы аҥаарыгар көтүрүллүөҕэ. Бу туһунан Дьокуускай куорат мэра Дмитрий Садовников «ТАСС Дальний Восток» кииҥҥэ пресс-кэмпириэнсийэҕэ иһитиннэрдэ.
«Губинскай — аҕыс уокуруктан биирдэстэрэ, чугастааҕы кэмҥэ маһынан тутуллубут олорор пуондата суох хаалыаҕа. Бу олус үчүгэй түмүк. Территориялары биир кэлимникк сайыннарыы туһунан дуогабары олоххо киллэрии — Губинскай уокурукка ситиһиилээхтик олоххо киирэр бастакы улахан бырайыактартан биирдэстэрэ. Икки дьиэни көтүрэр хаалла. Биһиги ону эһиил оҥорор былааннаахпыт. Эрэллээхпин, сыл бастакы кыбаарталыгар эбэтэр сыл бастакы аҥаарыгар», — диэн Дмитрий Садовников иһитиннэрдэ.
Дьокуускай мэра бэлиэтээбитинэн, киин куоракка 2577 дьиэттэн 1136 олорорго табыгаһа суоҕунан уонна көтүрүллэринэн билиниллибит. Кинилэр уопсай иэннэрэ 524 000 кв. м.
«Салгыы иннибит диэки баран иһэбит. Биһиги бу бырагырааманы Губинскай уокурукка эрэ буолбакка, атын уокуруктарга эмиэ олоххо киллэрэр былааннаахпыт. Мас олорор пуондабыт элбэх, кинилэр оннуларыгар таас элбэх кыбартыыралаах дьиэлэри тутуохпут. Куоракка 18 КРТ дуогабара түһэрсилиннэ. Бу бырайыактар чэрчилэринэн биһиги дьиэ тутааччылары өйүөхпүт: кинилэргэ саҥа дьиэлэри туталларыгар уонна эргэлэри көтүрэллэригэр көмөлөһүөхпүт», — диэн Садовников эбэн эттэ.
