Саха сирин баһылыга Айсен Николаев Санкт-Петербурга «Креативнай экэниэмикэ күннэрэ» пуорум үлэтигэр кытынна. Таврическай дыбарыаска эрэгийиэннэр салайааччыларын уонна федеральнай сайдыы институттарын кытта креативнай индустриялары эрэгийиэннэргэ сайыннарыыга анаммыт дьыалабыай сессия чэрчитинэн кини өрөспүүбүлүкэ уопутун үллэһиннэ, ситиһиилэрин, соруктарын уонна чугастааҕы кэмҥэ сыалларын туһунан кэпсээтэ.
Өрөспүүбүлүкэ баһылыга бэлиэтээбитинэн, Саха сиригэр креативнай экэниэмикэ — бу бастатан туран дьоҥҥо инвестиция. «Биһиэхэ креативнай индустриялар, бастатан туран, биһиэхэ олорор дьон бэйэлэрин олоххо ситиһиилээхтик киллэрэр кыахтарын быһыытынан интэриэһинэйдэр. Биһиги дьон хапытаалын, талааннаах дьоммут Москубаҕа уонна Питергэ барбакка, төрөөбүт дойдуларыгар ситиһиилээхтик үлэлииллэрин-хамныылларын туһугар охсуһуохтаахпыт», — диэн өрөспүүбүлүкэ баһылыга бэлиэтээтэ.
Култуураҕа уонна профессиональнай компетенцияларга тирэҕирэн, Саха сиригэр киинэни, анимацияны, видео оонньуулары, муоданы уонна ювелирнай ускуустубаны сайыннараллар. Приоритеттэри компетенциялар, ураты буолуу уонна наадыйыы дьүөрэлэһиилэринэн талаллар.
Креативнай индустриялар өрөспүүбүлүкэ экэниэмикэтин суолталаах чааһыгар кубулуйаллар. Бырабыыталыстыба 2025 сыллааҕы отчуотунан, манна 51,2 тыһыынча киһи дьарыктанар. 2024 сылга оҥоһуллубут эбиллибит сыана кээмэйэ 31,94 млрд солкуобайга тэҥнэстэ. Бу көрдөрүүнэн Саха сирэ Уһук Илиҥҥэ иккис миэстэни ылар.
Салгыы кэрдиис кэм — ситиһиллибит кыайыыларга олоҕуран толору хааччыллыылаах креативнай индустриялары тэрийии. «Билигин биһиэхэ сүрүн сорукпут — киинэбитин аан дойдуга биллибит култуура көстүүтүттэн индустрияҕа кубулутуу. Ааспыт сылга киинэлэрбит хомуурдара 280 мөлүйүөн солкуобайга тиийбитэ», — диэн өрөспүүбүлүкэ баһылыга эттэ.
Саха сиригэр киинэ индустриятын сайыннарарга Уһук Илин Киинэтин киинэ — саҥа көрүҥнээх киинэ павильона оҥоһуллар, бу толору оҥорон таһаарыы түһүмэхтэрин хааччыйыаҕа, ол иһигэр оҥоһуу өйү туһанан. «Бу Киин киинэ саха киинэтин уонна Уһук Илин киинэтин индустрия быһыытынан хаачыстыба өттүнэн саҥа таһымҥа таһаарарыгар эрэнэбин», — диэтэ Айсен Николаев.
2030 сылга диэри өрөспүүбүлүкэҕэ креативнай индустрияларга дьарыктаах дьон ахсаанын 70 тыһыынчаҕа диэри улаатыннарар сорук турар. Саха сирин баһылыга эппитинэн, өрөспүүбүлүкэ бэйэтин култуурунай нэһилиэстибэтин эрэ харыстаан хаалларбакка, ону таһынан олоҕурбут төрүккэ тирэҕирэн, эрэгийиэн тас өттүгэр киэҥник наадыйыллар аныгы креативнай бородуукталары оҥорон таһаарар кыахтаах.
