Саха Өрөспүүбүлүкэтигэр былырыын сокуонунан дьиэ кыылларын регистрациялааһын болдьохторо быһаарыллыбыттара. Бэтэринээринэй сулууспа салайааччыта Игнатий Колодезников социальнай ситимнэргэ быһа эпиир кэмигэр ирдэбиллэр тустарынан кэпсээтэ, диэн ЯСИА иһитиннэрэр.
Игнатий Колодезников бэлиэтээбитинэн, былырыын Судаарыстыбаннай Мунньах (Ил Түмэн) «Саха Өрөспүүбүлүкэтигэр дьиэ кыылларын регистрациялааһын туһунан» сокуону ылыммыта. Бу учуоту ыытарга, көрүүтэ-харайыыта суох буолууну уонна кырыктаах сыһыаны сэрэтэргэ, сүтэн хаалбыт кыыллары көрдүүргэ көмөлөһөргө, бэтэринээринэй-санитарнай нуормалары уонна быраабылалары хонтуруоллуурга кыаҕы биэриэҕэ.
Сүрүн саҥаны киллэрии — учуот сыыппара көрүҥэр көһүү. Өрөспүүбүлүкэҕэ дьиэ кыылларын учуотун биир кэлим электроннай баана үлэлиир. Регистрациялааһын процедурата хас да түһүмэхтэн турар: идентификационнай нүөмэри биэрии, чиптээһин, бас билээччи уонна кыыл дааннайдарын, бэриллэр быһыылар тустарынан сибидиэнньэлэри киллэрии.
Ыт оҕолорун бас билээччилэр икки ыйдарын туолбуттарын кэннэ 30 күн иһигэр регистрациялатыахтаахтар. Оттон улахан ыттары атыыласпыт дьон докумуоннары ылбыт күннэриттэн 30 күн иһигэр оҥорторуохтаахтар. Быстах кэмҥэ тутар пууннартан эбэтэр приюкка кыыллары регистрациялатарга үс күн иһигэр оҥоһуллуохтаах.
Регистрацияттан куотунуу иһин административнай эппиэтинэс көрүллэр. Гражданнарга ыстараап 3-тан 5 тыһыынча солкуобайга диэри, дуоһунастаах дьоҥҥо — 10-20 тыһыынча, юридическай сирэйдэргэ — 20-тан 40 тыһыынча солкуобайга диэри.
«Бу сокуон биһиги кыһалҕалары быһаарарбытыгар, ол иһигэр куттал суох буолуутугар көмөлөһүөҕэ. Идентификация систиэмэтэ бас билээччини көрдүүргэ бириэмэни кылгатар, кыылын хаһаайыныгар төнүннэрэр кыаҕы биэрэр», — диэтэ Саха Өрөспүүбүлүкэтин Бэтэринээринэй сулууспатын салайааччыта.
