Сэтинньигэ Дьокуускайга алта улахан суолталаах быһа охсуһууга саҥа хаартыскаҕа, видеоҕа түһэрэр комплекстар үлэҕэ киириэхтэрэ диэн өрөспүүбүлүкэ Суолларын салалтата иһитиннэрэр.
Суолга сылдьыы куттала суох буолуутун үрдэтэр дьаһаллар «Саха Өрөспүүбүлүкэтин суол хаһаайыстыбатын сайыннарыы уопсай систиэмэлээх дьаһаллара» диэн эрэгийиэннээҕи бырайыак чэрчитинэн, «Олох инфраструктурата» национальнай бырайыагынан олоххо киирэллэр.
Камералар номнуо маннык учаастактарга туруорулуннулар:
— Дзержинскай – Орджоникидзе – Чиряев уулуссалар быһа охсуһуулара;
— Лермонтов – Киров уулуссалар быһа охсуһуулара;
— Лермонтов – Петр Алексеев уулуссалар быһа охсуһуулара;
— Дзержинскай – Кальвица уулуссалар быһа охсуһуулара;
— Дзержинскай – Федор Попов уулуссалар быһа охсуһуулара;
— Дзержинскай – Строителей уулуссаларын быһа охсуһуулара.
Туруоруллубут тэриллэр суол быраабылатын кэһиилэри киэҥник уонна бэйэтэ бэлиэтиир кыахтаах:
— олохтоммут түргэни улаатыннарыы;
— тас сырдатар прибордарынан туһаныы быраабылатын кэһии;
— ПДД-ны кэһэн, утары айанныыр балаһаҕа тахсыы;
— бобуллар сирдэргэ эргийии, хаҥас диэки хайыһыы, төттөрү айаннааһын;
— суол бэлиэлэрин уонна суол разметкатын ирдэбиллэрин кэһии;
— бобуллубут светофор бэлиэтигэр айаннааһын;
— бобуллубут светофор бэлиэтигэр тохтобул лиинньэтин иннигэр тохтооһун быраабылатын толорбот буолуу;
— куру иилинэр быраабыланы кэһии;
— суоппар айаннаан иһэн, кэпсэтэргэ аналлаах тэрилэ суох, илиитинэн тутан төлөпүөнүнэн туһаныыта.
Хаартыскаҕа, видеоҕа түһэрэр систиэмэлэри киллэрии саахал тахсыытын аҕыйатарга, суол быраабылатын кэһиини сэрэтэргэ уонна суолга ыытыы култууратын үрдэтэргэ туһуланар.
«Олох инфраструктурата» национальнай бырайыак көмөтүнэн Дьокуускайга саҥа хаартыскаҕа, видеоҕа түһэрэр комплекстар баар буолаллар. Нацбырайыак сыала-соруга — суол ситимин нуормаҕа эппиэттиир турукка аҕалыы, саахал тахсыытын аччатыы уонна айанньыттар куттала суох буолууларын хааччыйыы. Кини дьаһалларын олоххо киллэрии өрөспүүбүлүкэ суолларыгар куттал суох буолуутун үрдэтэр соруктары аныгы хонтуруол технологияларын уонна инфраструктура быһаарыыларын холбоон, биир кэлимник быһаарарга кыаҕы биэрэр.
