Сунтаар улууһугар олохтоох көҕүлээһини өйүүр бырагыраама (ППМИ) чэрчитинэн олоххо киирбит үс кыайыылаах бырайыактан биирдэстэрэ — «Сардаана» уһуйааныгар оҕону эргиччи сайыннарар табыгастаах эйгэ баар буолла.
Бу бырайыак олоххо киириитин түмүгэр, уһуйааҥҥа оҕо саҥатын, толкуйдуур дьоҕурун уонна бытархай моторикатын сайыннарар аныгы анал тэриллэр турдулар. Улуус үрдүнэн оскуола иннинээҕи саастаах оҕолору көрөр-истэр 30-тан тахса тэрилтэ баар. Оттон «Сардаана» уһуйаан оҕо доруобуйатын чэбдигирдэр сыаллаах үлэлиир соҕотох анал хайысхалааҕынан биллэр.
Хаартыска: Сунтаар улууһун дьаһалтатын пресс-сулууспата
Сайыннарар эйгэ арыллыытын үөрүүлээх тэрээһинигэр Сунтаар улууһун баһылыга Анатолий Григорьев кыттыыны ылла. Кини кырачааннар чэгиэн-чэбдик буолалларын туһугар түмсүүлээх үлэ ураты суолтатын бэлиэтээтэ: «Кэнчээри ыччаппыт чэгиэн-чэбдик буоларын туһугар бары биир сомоҕо буолан үлэлээтэхпитинэ эрэ ситиһиилээх буолуохпут», — диэн улуус баһылыга эттэ, суруйда Сунтаар улууһун дьаһалтатын пресс-сулууспата.
