Сэтинньи 4 күнүгэр Дьокуускайга норуоттар икки ардыларынааҕы киинэ бэстибээлэ аһылынна. Тэрээһин аан бастаан кыһын ыытыллар, бэстибээл ыалдьыттара муус ыллыгынан национальнай таҥастаах хаамтылар. Аһыллыы саамай чаҕылхай хаартыскалара – СИА репортаһыгар.
Быйыл бэстибээл күрэс бырагырааматыгар Арассыыйаттан, Индияттан, Монголияттан, Японияттан, Грецияттан, Пакистантан, Кыргызстантан 11 толору метражтаах киинэ киирдэ. Күрэс сүрүн дьүүллүүр сүбэтин Арассыыйа продюсера уонна киинэ үөрэхтээҕэ Наталья Мокрицкая салайда. Арассыыйаны икки саха киинэтэ көрдөрүөҕэ: Степан Бурнашев «Пентхаус» уонна Дмитрий Давыдов «Прозрачные земли».
Бэстибээл сүрүн наҕараадата — «Кыһыл көмүс хаар ачыкыта» — бастыҥ уус-уран киинэҕэ туттарыллыаҕа. Ону тэҥэ «Үрүҥ көмүс хаар ачыкылара» туспа категорияларга көрүллэллэр, оттон саха ааптардарын ортолоругар кыайыылааҕы көрөөччүлэр быһаарыахтара. Саха сирин норуоттар икки ардыларынааҕы киинэ бэстибээлэ эрэгийиэн киинигэр сэтинньи 4 күнүттэн 9 күнүгэр диэри ыытыллар.
