Хабаровскай куоракка ыытыллыбыт үрдүк таһымнаах бэстибээлгэ Абаҕатааҕы У. Нохсоороп аатынан духуобунас киинин иһинэн үлэлиир Ф. Потапов аатынан “Маска” оҕо тыйаатырын устуудьайата “Кындыкаан. Лучик Севера” диэн Лидия Тарасова остуоруйа –номоҕунан испэктээҕи илдьэн көрдөрдө. Испэктээк режиссерунан Дьокуускайдааҕы култуура колледжын устудьуоҥката Милена Черемкина устуудьуйа салайааччыта, духуобунас киинин режиссера Евгения Поповалыын үлэлээтилэр. Испиктээккэ кырачаан артыыстар төрөөбүт Сахаларын сиригэр олорор норуот ураты олоҕун-дьаһаҕын, култууратын, үтүө үгэстэрин, үйэлээх муудараһын толору арыйан көрдөрдүлэр. Тоҕус ыйдаах томороон тымныылаах кыраайга олорооччулар тулуурдарын, олоххо кэрэҕэ, сырдыкка, үтүөҕэ талаһыыларын хас биирдии көрөөччүгэ, ону ааһан дьүүллүүр сүбэҕэ табатык тиэрдэн, сүрэхтэрин кылын таарыйан, испиктээк 1 истиэпэннээх лауреат аатын ылла.
Ону ааһан «Төрүт үгэстэри арыйар бастыӈ испиктээк» диэн анал аат хаһаайына буолла. Оттон испиктээк сүрүн оруолун толорбут кырачаан артыыс Сайнаара Колодезникова «Бэстибээл сүрүн оруолу бастыҥ толорооччута» анал аатынан наҕараадаланна. Үһүс кылааска үөрэнэр кырачаан кыысчааҥҥа, Сайнаараҕа, эрэгийиэннэр икки ардыларынааҕы таһымнаах сыанаҕа тахсыы улахан тургутуу уонна ситиһии буолар.
Бу кыайыы хас биирдии артыыс оҕо, испиктээк туруутугар үлэлээбит дьон, төрөппүттэр биир ситимнээх дьаныардаах үлэлэрин, биир сомоҕо күүстэрин түмүгэ. Ис сүрэхпититтэн сыана кыра дьоруойдарын, испиктээги туруорбут режиссердары Евгения Николаевнаны, Милена Кириковнаны уонна Үстүүн Нохсоороп аатынан Абаҕатааҕы Духуобунас киинин үлэһиттэрин эҕэрдэлиибит. Төрөппүттэргэ уонна бары күүс-көмө буолбут дьоҥҥо махтал тыллары этэбит. Артыыс оҕолорго, Евгения Николаевнаҕа, Милена Кириковнаҕа тэтимнэрин намтаппакка, саҥаттан саҥа үрдэллэри эрэллээхтик, ситиһиилээхтик дабайан иһэллэригэр баҕарабыт.
Ааптар: Мария АДАМОВА
